पोखरा । स्वतन्त्र चुनाव जितेर नेकपामा प्रवेश गरे पनि सांसद राजीव गुरुङ (दीपक मनाङे) ले आफूलाई स्वतन्त्र सांसदको हैसियत दिन संसद सचिवालयमा निवेदन दिए । सोमबारको उनको निवेदन पछि मंगलबारदेखि नै उनलाई स्वतन्त्र सांसदको छुट्टै कुर्ची र टेबुल उपलब्ध गराइएको छ ।

सपथ खाएको केही समयसम्म उनलाई स्वतन्त्रकै टेबुल कुर्ची थियो । नेकपा छिरेपछि उनी नेकपाकै सांसदहरुसँग हार लागेर बस्थे । सर्वोच्चको फैसला पछि नेकपा सिंगो पार्टी छैन । एमाले र माओवादी छुट्टाछुट्टै बन्दा नेकपा छिरेका सांसद मनाङे भने दुवै दलमा बस्न चाहेनन् । उनको स्वतन्त्र हैसियत कायम भएको छ ।

मनाङेले आफू स्वतन्त्र भएको निवेदन बुझाएपछि पहिले नेकपाको खातामा उनको नामबाट गएको लेबी समेत फिर्ता मागेका छन् । नेकपाको खातामा उनको नामबाट १ लाख भन्दा बढी रकम जम्मा भएको उनको दाबी छ ।

संसद सचिवालयका अनुसार प्रत्येक महिना ६ हजार ५ सयका दरले उनको तलब भत्ताबाट नेकपाको खातामा गएको थियो । ‘सबै रकम माग्नु भएको छ । उहाँको निवेदन दर्ता पनि भयो,’ एक कर्मचारीले भने, ‘अब यो जानकारी एमाले माओवादी दुवै दललाई दिन्छौं ।’

सांसद मनाङेले मुख्यमन्त्री पृथ्वीसुब्बा गुरुङलाई समर्थन गरेको र नेकपाको सदस्य भएको औपचारिक जानकारी संसद सचिवालयलाई नभएको सचिव हरिराज पोखरेलले बताए । आधिकारिक पत्र बिना नै मनाङेको लेबी काटिएको छ । हालसम्म आफू नेकपाको संगठित सदस्य समेत नबनेको सांसद मनाङेले बताए ।