पोखरा । गण्डकी प्रदेशमा आइतबार एकै दिन १ सय ६३ जनामा कोरोना पुष्टि भयो । सोमबार भने संख्या घटेर १ सय १ जनामा संक्रमण देखिएको छ । सोमबार ४ जनाको कोरोनाकै कारण मृत्यु भयो ।

कास्कीमा मात्र पनि आइतबार १ सय १४ जनामा कोरोना देखियो । सोमबार ६९ जनामा पोजेटिभ आयो भने कास्कीमै २ जनाको कोरोनाका कारण ज्यान गयो । सोमबार पोखरा २५ का ९१ वर्षीय पुरुषको मेडिप्लस हस्पिटलमा ज्यान गएको हो । उनलाई वैशाख ७ गते कोरोना पुष्टि भएको थियो । पोखरा १ की ५५ वर्षीया महिलाको पनि मेडिप्लस हस्पिटलमा उपचारकै क्रममा मृत्यु भएको हो । प्रदेशमा कोरोनाबाट ज्यान गुमाउनेहरु म्याग्दी र स्याङ्जाका १/१ जना छन् ।

रघुगंगा गाउँपालिका ३ का ७८ वर्षीय पुरुष र वालिङका ५८ वर्षीय पुरुषको पनि सोमबार उपचारकै क्रममा मृत्यु भएको हो । पछिल्लो समय संक्रमित र मृत्यु हुनेहरुको संख्याको ग्राफ दिनानुदिन बढिरहेको छ ।

प्रदेशमा कोरोना संक्रमणबाट ज्यान गुमाउनेको संख्या २ सय १५ पुगेको छ भने ९ सय ३७ जना सक्रिय संक्रमितको संख्या रहेको छ ।

पछिल्लो २४ घन्टामा देशभर थप ३ हजार ५५६ जनामा कोरोना भाइरस (कोभिड–१९) संक्रमण पुष्टि भएको छ । यस्तै थप १२ जना संक्रमितको मृत्यु भएको स्वास्थ्य तथा जनसंख्या मन्त्रालयले जनाएको छ ।

योसँगै नेपालमा कोरोना संक्रमितको कुल ३ लाख ३ हजार ५ सय ६१ पुगेको छ । जसमध्ये गत २४ घण्टामा १२ सहित ३ हजार १ सय ७६ जनाको मृत्यु भएको छ भने हालसम्म २ लाख ७७ हजार ९ सय ५१ जना संक्रमणमुक्त भएका छन् । पछिल्लो २४ घन्टामा ३ सय ७८ जना निको भएको मन्त्रालयले जनाएको छ ।