म्याग्दी । म्याग्दीको अन्नपूर्ण गाउँपालिका ५ स्थित शिख माविमा नमुना छात्राबास भवन शिलान्यास गरिएको छ । गाउँपालिकाका अध्यक्ष डमबहादुर गर्बुजा पुनले आइतबार छात्राबास भवन शिलान्यास गरेका हुन् । छात्राबास भवनमा ३ तला र ३० कोठा हुनेछन् ।

छात्राबास उद्घाटनपछि अध्यक्ष गर्बुजा पुनले छात्राबास भवन निर्माणपछि दुर्गम क्षेत्रका विद्यार्थीलाई थप सहज हुने विश्वास व्यक्त गरे । गाउँपालिकाले शैक्षिक क्षेत्रको विकासलाई जोड दिएको उनको भनाइ थियो । उनले विद्यालयलाई शिक्षाको क्षेत्रमा अघि ल्याउन अन्नपूर्ण गाउँपालिकाले सक्दो सहयोग गर्ने प्रतिबद्धता जनाए ।

भवनका लागि २ करोड रुपैयाँ लागत अनुमान गरी ठेक्का आह्वान गरिएकोमा ३०.०२ प्रतिशत घटेर ढोरपाटन निर्माण सेवा प्रालिले निर्माण जिम्मा पाएको छ । यही असार मसान्तभित्रमा भवन निर्माण सक्ने लक्ष्य रहेको विद्यालयका प्रधानअध्यापक केदार कार्कीले जानकारी दिए ।

विद्यालयमा कक्षा १ देखि १२ सम्म जम्मा २१५ जना विद्यार्थी अध्ययनरत छन् । विकट क्षेत्रका बालबालिकालाई विद्यालयमै खाने बस्ने सुविधासहित अध्ययनको व्यवस्था मिलाउने सामाजिक विकास मन्त्रालयको अवधारणाअनुसार आवासीय विद्यालय सञ्चालन गर्न लागिएको हो ।