पोखरा । पोखरा ४ गैह्रापाटनमा किनमेल संसार सञ्चालनमा आएको छ । यसअघि अनलाइन व्यवसायमात्रै गर्दै आएको ‘किनमेल संसार’ को आउटलेट शनिबार शुभारम्भ गरिएको छ ।

कलाकारद्वय प्रकाश घिमिरे र माओत्से गुरुङ, रेडियो अन्नपूर्णकी प्रबन्ध निर्देशक सुनयना पालिखे र नायिका रजनी गुरुङले रिबन काटेर किनमेल संसार उद्घाटन गरे । पत्रकार संजयकुमार मल्ल र उनकी श्रीमती अञ्जु मल्लले सञ्चालनमा ल्याएका हुन् ।

किनमेल संसारमा ब्रान्डेड बेडसेट उपलब्ध रहेको सञ्चालक मल्लले जानकारी दिए । बेडसेटका लागि आवश्यक पर्ने तन्ना, सिरानी र सिरकसँगै महिला दिदीबहिनीहरुका लागि कुर्तासमेत किनमेलमा उपलब्ध हुनेछन् । रेडियो अन्नपूर्णका स्टेसन म्यानेजरसमेत रहेका मल्लले ग्राहकको इच्छाबमोजिम नै आगामी दिनमा आफूहरु अघि बढ्ने प्रतिबद्धता जनाए ।

कलाकार प्रकाश घिमिरेले किनमेल संसारको प्रगतिको कामना गर्दै सकारात्मक सोचले अगाडि बढे सफल भइने बताए । कलाकार तथा चलचित्र निर्देशक माओत्से गुरुङले कोभिडले सबैलाई पाठ सिकाएको भन्दै त्यसको परिणाम संजय मल्ल भएको बताए ।

रेडियो अन्नपूर्णकी प्रबन्ध निर्देशक सुनयना पालिखेले कोभिडका बेला मल्ल परिवारले चुनौतीलाई अवसरको रुपमा लिएको बताइन् । नायिका रजनी गुरुङले कलाकार र पत्रकारको सम्बन्ध नङ र मासुको जस्तो भएको उल्लेख गर्दै उनले किनमेल संसारले सम्बन्धलाई जोड्ने सेतुको रुपमा रहने विश्वास व्यक्त गरिन् ।