लेखनाथ । पोखरा ३२, राजाका चौतारामा शान्ति, मेलमिलाप र सहअस्तित्वको ऐतिहासिक राजाका चौताराको भूमिपूजन भएको छ ।

बिहीबार एक समारोहबीच भगवती दल गण, फूलबारीका प्रमुख सेनानी दिवाकर कार्कीले शिलान्यासको पूर्वसन्ध्यामा भूमिपूजा गरेका हुन् ।

वडाध्यक्ष, वडा सदस्य, चौतारा पुनःनिर्माण समितिका अध्यक्ष, सदस्य लगायत स्थानीयको उपस्थितिमा भजनकीर्तन सहित भूमिपूजा गरिएको हो । चौताराको नेपाली सेनाका प्रमुख प्रधानसेनापति पूर्णचन्द्र थापा र प्रज्ञा प्रतिष्ठानका उपकुलपति जगमान गुरुङको उपस्थितिमा वैशाख १० मा शिलान्यास गर्ने तयारी छ ।

ब्रह्मरुपा मावि परिसरमा करिब १ रोपनी क्षेत्रफलमा राजाको चौतारा नामक चौतारा पुनःनिमार्णमा ऐतिहासिक राजाको झल्को आउने सालिक, चौतारोको व्यवस्थापन, बटुवा बस्ने टहरो, पानीको घडा, पार्क निर्माण नेपाली सेनाको भगवती दल गण फूलबारीले गर्ने भएको छ ।

राजाका चौतारो पूर्वमा कास्कीको देउराली, पश्चिममा गगनगौंडा बजार, उत्तरमा रुपाताल र दक्षिणमा शुक्लागण्डकी नगरपालिकाभित्र विशाल मालमुल फाँटमा अवस्थित छ ।