दमौली। भीमाद नगरपालिका ८ का वडाध्यक्ष बुद्धिमान श्रेष्ठले सेवाग्राहीलाई कुटपिट गरेका छन् । हकवालाको सिफारिस लिन पुगेका सोही वडाका चिरञ्जीवी खनाललाई वडाध्यक्ष श्रेष्ठले कुटपिट गरेका हुन् ।

सेवाग्राहीसँग हातपात भएको तस्बिर र भिडियो अहिले सामाजिक सञ्जालमा भाइरल छ । वडाध्यक्ष श्रेष्ठले आफूमाथि हातपात भएपछि प्रतिवाद गरेको प्रतिक्रिया दिएका छन् ।

सेवाग्राही खनाल एकल महिला आफ्नी सानीआमाको निधनपछि हकवालाको सिफारिस लिन गएका थिए । अनुगमनमा निस्केका श्रेष्ठ भएको ठाउँमा सिफारिस लिन जाँदा खनालले दाबी गरेको जग्गामा एक असहाय महिलाको घर रहेको भन्दै वडाध्यक्षले सिफारिस दिन मानेनन् ।

खनाल भने त्यस विषयमा छलफल गर्न तयार रहेको भए पनि वडाध्यक्षले बाँकी सिफारिस नदिएको बताउँछन् । सिफारिस नदिएको भन्दै आफूमाथि ढुंगाले प्रहार भएको वडाध्यक्ष श्रेष्ठको दाबी छ ।

उनले भने, ‘सिफारिस नदिएको झोकमा आफूलाई ढुंगाले हानेपछि प्रतिरक्षा गरेकोमात्र हुँ । मैले हात पहिले हालेको आरोप गलत छ ।’

खनालले भने वडाध्यक्षमाथि कारबाही माग्दै इलाका प्रहरी कार्यालय भीमादमा उजुरी दिएका छन् ।