आहारारा गोल्ड कप संकटालाई

Bijay Nepal विजय नेपाल
चैत्र २८, २०७७
sankata

पोखरा, २८ चैत । संकटा क्लबले आहारारा गोल्ड कपको उपाधि जितेको छ । १९ औं संस्करणको फाइनलमा संकटाले पाहुना टोली अफ्रिकन रुट एसोसिएसन, क्यामरुनलाई टाइब्रेकरको शिकार बनाउँदै उपाधिसहित १० लाख रुपैयाँ पुरस्कार प्राप्त गर्न सफल भयो । उपविजेताले ५ लाख पुरस्कार पायो ।

पोखरा रंगशालामा शनिबार फाइनलमा दोस्रो हाफमा बराबरी खेल्दै संकटाले अन्ततः उपाधिमाथि आफ्नो नाम दर्ज गर्न सफल भएको हो । निर्धारित ९० मिनेटको खेल १–१ को बराबरीमा टुंगिएपछि अतिरिक्त ३० मिनेटमा दुवै पक्षबाट गोल ननिस्केपछि पेनाल्टी सुट आउटमा निर्णय लिनुपरेको थियो । जसमा संकटाको पक्षमा ४–२ को गोलअन्तर निस्केको थियो।

पेनाल्टीमा अफ्रिकन रुट एसोसिएसनका एमबाकोपको प्रहार विपक्षी किपर राजाबाबु थापाले उत्कृष्ट सेफ गरे भने कुटीको पहिलो प्रहार नै खेर गएको थियो । उसका लागि यानिक र रिमलेमात्र बललाई जाली चुमाउन सके ।

यता, संकटाका लागि अमित तामाङ, सुवास गुरुङ, नेराज बस्नेत र आयुष घलानले गोल गरेका थिए । क्याप्टेन सरोज दाहालकै प्रहार भने विपक्षी कीपरले बचाएका थिए ।

त्यसअघि अफ्रिकन रुट्सका लागि ज्याकस बसिकले पहिलो हाफमा गोल गर्दै टिमलाई अग्रता दिलाएकोमा दोस्रो हाफको सुरुवातमै संकटाका लागि विदेशी खेलाडी ग्लोरीले बराबरी गोल फर्काएका हुन् ।

प्रतियोगितामा संकटाका किपर राजाबाबु थापा उत्कृष्ट खेलाडी घोषित हुँदै स्कुटर चढे । विधागत उपाधि पनि संकटाको पक्षमा धेरै गयो । जसमा राजाबाबु थापा उत्कृष्ट कीपर, नेराज बस्नेत उत्कृष्ट डिफेन्डर घोषित हुँदा अफ्रिकनका रिम उत्कृष्ट मिडफिल्डर, बसिक उत्कृष्ट स्ट्राइकर र सर्ज बोरिस उत्कृष्ट कोच घोषित भए । उनीहरुलाई स्व. सूर्यबहादुर केसीको नाममा जनही २५ हजार रुपैयाँ पुरस्कार प्रदान गरियो ।

हाइ स्कोररको उपाधि ४ जनाले बाँडेर लिए । जसमा नेपाल प्रहरी क्लबका बुद्धबल लामा, संकटाका ग्लोरी, अफ्रिकन रुट्सका मौसा र बसिक हुन् ।

विजेतालाई गण्डकी प्रदेश मुख्यमन्त्री पृथ्वीसुव्वा गुरुङ, आयोजक सहारा क्लब पोखरा अध्यक्ष केशवबहादुर थापा, पत्रकार महासंघ कास्की अध्यक्ष विमला भण्डारी, मुख्य प्रायोजक हिमश्री फुड्सका निर्देशकहरु प्रकाश केसी, किरण केसी र रोशन केसीले पुरस्कार प्रदान गरे ।

Related News

सम्बन्धित समाचार

    hero news full width

    sanil ads

    wordlink ads

    trending post

    ट्रेन्डिङ्ग