पोखरा । कर्मफ्लाइटस् फाउन्डेसन नेपालले २०७२ मा गएको विनासकारी भूकम्पको छैटौं वर्ष स्मृतिमा स्वास्थ्य शिविर गरेको छ ।

बारपाक सुलिकोट गाउँपालिकाको सहकार्यमा २ दिनसम्म आयोजित शिविरमा करिब ९ सय ५० जनाले स्वास्थ्य लाभ लिएका छन् ।

कर्मफ्लाइटस्का स्वास्थ्य संयोजक कृष्णप्रसाद पाण्डेले शिविरमा स्त्री तथा प्रसूति रोग विशेषज्ञ तथा हाड जोर्नी तथा नसा रोगको विशेषज्ञ उपचार गरिएको थियो । साथै वरिष्ठ डाक्टरबाट नाक, कान, घाँटी रोग, सामान्य चिकित्सामध्ये पेट, छाती दुखाई, तल्लो पेट दुख्ने, एलर्जी स्वास्थ्य समस्याको उपचार तथा रोग प्रतिरोधात्मक परामर्श प्रदान गरिएको थियो ।

शिविरका मिडिया संयोजक सलिना गुरुङले गम्भीर स्वास्थ्य सेवाका आवश्यकता पूर्ति गर्न शिविरले महत्वपूर्ण भूमिका खेल्ने बताइन् ।

माझथर मावि स्वाँरामा भएको शिविरमा बारपाक सुलिकोट ३ र ४ (साविक सौरपानी र स्वाँरा गाविस) अन्तर्गतका मानिसहरु हिडेरै आएको गाउँपालिकाका अध्यक्ष विष्णुप्रसाद भट्टले बताए ।

शिविरपछि बाँकी औषधी हेल्ट असिस्टेन्ट कृष्ण भट्ट मार्फत गाउँपालिकाको स्वास्थ्य शाखालाई हस्तान्तरण गरिएको संस्थाका कार्यक्रम निर्देशक प्रेमबहादुर कुँवरले जानकारी दिए । कार्यक्रममा ४० जनाको स्वास्थ्यकर्मी टोली र माझथर माविका शिक्षक विद्यार्थीले स्वयंसेवी भूमिका निर्वाह गरेका थिए ।