लेखनाथ । संघीय सासंद तथा पूर्व स्वास्थ्य मन्त्री खगराज अधिकारीले विकास निर्माणका क्षेत्रमा राजनीति नहुने बताएका छन् । पोखरा २७ को छत्रेढुंगामा स्थानीय पूर्वाधार क्षेत्र विकास कोषको आर्थिक सहयोग र स्थानीय जनसहभागितामा निर्माण भएको ढलान बाटोको शनिबार उद्घाटन गर्दै अधिकारीले चुनावमा जो जसलाई भोट दिए पनि विकास निर्माणमा सबै आफ्नै हुने भन्दै जनसहभागितामा सरकारको पनि साथ रहने बताएका हुन् ।

आफ्नो कार्यकालमा केन्द्रीय स्तरका धेरै योजना ल्याउन सफल भएको बताउँदै उनले यस क्षेत्रका जनताको जीवनस्तरमा सुधार आउने गरी विकास निर्माणका योजनालाई अघि बढाएको बताए ।

‘संघीय सासंद विकास कोषको १० लाख र स्थानीयवासीको ४ लाख ५० हजार गरी १४ लाख ५० हजारको लागतमा निर्माण भएको १ सय ८२ मिटर लम्बाइको बाटो ढलान गरी निर्माण हुँदा त्यस क्षेत्रका ५० घर परिवार लाभान्वित भएको बताइएको छ ।

बाटो निर्माण उपभोक्ता समितिका अध्यक्ष कर्णबहादुर ढकालको अध्यक्षतामा भएको कार्यक्रममा नेकपा एमाले वडा नं २७ का अध्यक्ष सूर्यमणि लामिछाने, स्थानीय समाजसेवी धनबहादुर गुरुङ र शुक्र अधिकारी लगायतले बोलेका थिए ।