पोखरा । भट्टराई कुलवंश प्रतिष्ठान नेपालको २७ औं वार्षिक साधारणसभा तथा नवौं महाधिवेशन पोखरामा शुक्रबार सुरु भयो ।

महाधिवेशनको सर्वोच्च अदालतका न्यायाधीश डा. आनन्दमोहन भट्टराईले उद्घाटन गरे ।

त्यस अवसरमा प्रमुख अतिथि भट्टराईले प्रत्येकले आफ्नो वंशको प्रतिष्ठा वृद्धि गर्ने कार्यमा लाग्दा राष्ट्रकै समृद्धि हुने बताए । उनले भट्टराई कुल वंश प्रतिष्ठानले आफ्नो परिवारलाई संस्कारित बनाउने प्रयासमा लागेकोमा खुसी व्यक्त गरे ।

कार्यक्रमको अध्यक्षको आसनबाट बोल्दै प्रतिष्ठानका अध्यक्ष शेरबहादुर भट्टराईले झापाको दमक–४ मा निर्मित वशिष्ठ आश्रमलाई भट्टराईहरुको मूलधारको रुपमा विकास गरिएको र जग्गा खरिद, मन्दिरहरु निर्माण, विद्यापीठ सञ्चालन लगायतका कार्यहरु गरिएको जानकारी दिए ।

स्वागत गर्दै प्रतिष्ठानका गण्डकी प्रदेश अध्यक्ष तथा महाधिवेशन व्यवस्थापन समिति संयोजक शैलेन्द्रमोहन भट्टराईले महाधिवेशन गर्न पाउँदा पोखरावासी हर्षित भएको बताए ।

कार्यक्रम सञ्चालन महासचिव चन्द्रप्रसाद भट्टराईले गरेका थिए । २ दिनसम्म चल्ने महाधिवेशन नयाँ कार्यसमिति निर्वाचित गर्दै सम्पन्न हुनेछ ।