काठमाडौं । बल्खुको कार्यालय भूकम्पले ढालेपछि धुम्बावाराहीमा सरेको नेकपा एमालेको मुख्यालय अबको ५ वर्ष थापाथलीमा रहने भएको छ । धुम्बाराहीमा रहेको पार्टी कार्यालय थापाथलीस्थित सञ्जय अग्रवालको घरमा सर्न लागेको प्रधानमन्त्रीका विशेष आर्थिक सल्लाहकार मोतिलाल दुगडले बताए ।

एमालेका अध्यक्ष तथा प्रधानमन्त्री केपी शर्मा ओली पार्टीको नयाँ कार्यालय भवनको बुुधबार निरीक्षण गरेका छन् । प्रधानमन्त्रीलाई नयाँ पार्टी कार्यालय देखाएपछि दुगडले भने, ‘धुम्बाराहीमा साँघुरो भइरहेको थियो। हाइवेबाट नजिकै भएकोले डिस्टर्ब हुने र अनि अपायक ठाउँमा पनि थियो। त्यसैले अर्को ठाउँ खोजिरहेका थियौं। नयाँ ठाउँमा प्रधानमन्त्रीज्यूलाई पनि मन पर्यो। अब वैशाख १ गतेबाट पार्टी कार्यालय यहाँ सर्छ ।’

घरधनीसँग ५ वर्षका लागि सम्झौता गरिएको जानकारी दुगडले दिए । तर भाडा रकम भने खुलाएनन् । ‘घरधनी मेरो चिनजानको साथी र पारिवारिक नातेदार पनि हो । भाडा जति दिए पनि लिनुहुन्छ । नलिन पनि सक्नुहुन्छ । उहाँले पार्टीलाई सहयोग गरेजस्तै हो,’ दुगडले भने ।

सय वटाभन्दा गाडी अटाउन सक्ने ४ रोपनीमा बनेको भवनमा सबै सुविधायुक्त छ । आफ्नै पहलमा नयाँ ठाउँ फेला परेको भन्दै उनले बल्खुमा पनि दुई वर्षभित्र नयाँ पार्टी कार्यालय तयार हुने बताए ।