खास्टेताल महोत्सव तयारी अन्तिम चरणमा

Avatar आदर्श समाज सम्वाददाता
चैत्र ९, २०७७
Khaste Mela Photo

पोखरा । खास्टे तथा न्युरेनी ताल संरक्षण विकास समितिको आयोजनामा हुने ‘प्रथम लेखनाथ खास्टे ताल महोत्सव २०७७’ को तयारी अन्तिम चरणमा पुगेको छ ।

पोखरा २६ स्थित खास्टेताल र न्युरेनी तालको छेउमा चैत १२ देखि २२ गतेसम्म हुने महोत्सवको तयारी अन्तिम चरणमा पुगेको सोमबार पत्रकार सम्मेलन गरी आयोजकले जानकारी दिएको छ ।

तालको संरक्षण र संवद्र्धनसँगै आन्तरिक पर्यटन प्रवद्र्धन गर्ने उद्देश्यसहित पहिलो पटक खास्टे ताल महोत्सव तयारीमा स्थानीय जुटेका हुन् । महोत्सवमा स्थानीय कृषि उत्पादनलाई स्थान दिने भएको छ ।

महोत्सवमा १ सय १० वटा स्टल रहने मुल समारोह समिति संयोजक हरिप्रसाद अधिकारीले जानकारी दिए । जसमा १० वटा स्टल माछासहित स्थानीय कृषि उत्पादनको मात्र हुने उनको भनाइ छ । आयोजकले महोत्सवबाट ९८ लाख ५० हजार आम्दानी र ९७ लाख ५० हजार खर्च हुने अनुमान गरेको छ । महोत्सवको ५० हजार दर्शकले अवलोकन गर्ने अपेक्षा पनि गरिएको छ । खास्टे ताल किनारको खरानेफाँटमा हुने महोत्सवमा बालउद्यानसँगै मनोरञ्जनात्मक गतिविधिसमेत हुनेछ ।

राष्ट्रिय संगीतकर्मी संघले व्यवस्थापन गर्नेछ । खास्टे ताल किनारमा सहकारीमार्फत पालिएको माछाको परिकारले आन्तरिक तथा बाह्य पर्यटकलाई स्वागत गरिने छ । न्युरेनी ताल विशेष गरी चराचुरुंगी अध्ययन स्थलको रुपमा विकास गरिने उनको भनाइ थियो ।

मानवीय र प्राकृतिक अतिक्रमणको चपेटामा परेको ताल संरक्षणको लागि तत्कालीन लेखनाथ नगरपालिकाले माटोको ड्याम लगाएको थियो । तालको सीमांकन गरी ड्याम निर्माणपछि संरक्षणको पहल थालिएसँगै स्थानीयले सहकारीमार्फत व्यावसायिक माछापालन हुँदै आएको छ । तालमा ग्रासकार्प, कमन, रघु, नैनी, तिलपिया लगायतका माछा छन् ।

खास्टे र गुँदें तालबाट सहकारीले व्यावसायिक उत्पादन लिइसकेका छन् । पोखरा २६ अन्तर्गत लेखनाथ क्षेत्रका ३ वटा ताल एउटै वडामा छन् । गुँदे, खास्टे र न्युरेनी तालको संरक्षण अनिवार्य भइसकेको छ । रामसारमा सूचीकृत भइसकेको अवस्थामा ताल किनारमा पाइने जैविक विविधता संरक्षणलाई समेत महोत्सवले सहयोग पु¥याउने उनको विश्वास छ ।

Related News

सम्बन्धित समाचार

    hero news full width

    sanil ads

    wordlink ads