लमजुङ । मनाङमा शनिबार साँझ भएको ट्रक दुर्घटनामा ५ जनाको मृत्यु भएको छ । मनाङको नाँसो गाउँपालिका– ३ को खोत्रो गाउँ क्षेत्रमा उक्त दुर्घटना भएको प्रहरीले जनाएको छ ।

दुर्घटनामा परी घट्नास्थलमै नासों गाउँपालिका– ४ को ओडार गाउँमा बस्ने अन्दाजी ६÷७ वर्षका बालक लिउन गुरुङ, सोही गाउँकी ३५ वर्षीय महिला मनिषा गुरुङ र सोही गाउँकी ३६ वर्षीया महिला लालकाशी गुरुङको मृत्यु भएको थियो । मनिषा र लिउन आमा छोरा भएको प्रहरीको भनाइ छ ।

मनाङबाट घाइते अवस्थामा उपचारका लागि बेसीशहर पठाइएकोमा लमजुङको मस्र्याङ्दी गाउँपालिका– ५ घर भएका ट्रकका सहचालक लक्ष्मण नेपाली र मनाङको चामे गाउँपालिका– ४ बस्ने वर्ष ३५ को धनमान विकलाई लमजुङ जिल्ला अस्पताल ल्याउनासाथ मृतक घोषित गरिएको जिल्ला अस्पताल लमजुङका प्रमुख हेमन्त श्रेष्ठले बताए ।

उनका अनुसार उक्त दुर्घटनामा घाइते हुनेहरूमा सोही ट्रकका चालक लमजुङ घर भएका सुमन तामाङ तथा अन्दाजी ६/७ वर्ष उमेरका बालकद्वय थिउन गुरुङ र निहल गुरुङ रहेको प्रहरी नायव उपरीक्षक सुभास खड्काले बताए । उनले भने ‘घाइते बालकहरू पनि नासों गाउँपालिका– ४ को ओडार गाउँकै हुन् । घाइते उनीहरू सबैको उपचारका लागि लमजुङको सदरमुकाम बेसीशहर पठाइएको प्रहरी नायव उपरीक्षक खड्काले जानकारी दिए ।

ठेकेदारको सिमेन्ट लोड गरी जाँदै गरेको ध १ ख ५९२ नंबरको ट्रक बेसीशहरबाट मनाङको सदरमुकाम चामेतर्फ जादै थियो । ओभर लोडका कारण उकालोमा ब्रेक फेल भएर उक्त दुर्घटना भएको देखिन्छ प्रहरी नायव उपरीक्षक खड्काले बताए । उनका अनुसार सो ट्रक सडकबाट करिब १५० मिटर तल मस्र्याङदी नदीमा खसेको थियो ।

घटनास्थलमै मृत्यु भएका ३ जनालाई पोष्टमार्टमका लागि जिल्ला अस्पताल मनाङमा ल्याइएको मनाङका प्रमुख जिल्ला अधिकारी विष्णु लामीछानेले बताए । उनका अनुसार अन्यलाई उपचारका लागि बेसीशहर पठाइएको छ ।

उक्त दुर्घटनाको जानकारी पाएपछि तत्कालै आफूहरू तत्काल उद्धारमा खटिएको सशस्त्र प्रहरी बल नेपाल मनाङका प्रमुख प्रहरी नायव उपरीक्षक होमनाथ पन्थीले बताए ।

उनका अनुसार नेपाली सेना, नेपाल प्रहरी, सशस्त्र प्रहरी र स्थानीयहरू मिलेर घाइतेहरूको उद्दार गरिएको हो ।