दोहोरीगीतमा आयोजक प्रथम

आदर्श समाज सम्वाददाता
फागुन २४, २०७७
Lokdohori~nabaraj

लमजुङ  । जिल्लास्तरीय खुला लोकदोहोरी प्रतियोगितामा आयोजक लोक तथा दोहोरीगीत प्रतिष्ठान नेपाल लमजुङ पहिलो भएको छ ।

फाइनलमा सुन्दरबजार नगरपालिकाको समूहलाई मात्र १ अंकले हराउँदै आयोजक समूह पहिलो भएको हो । विजेता टिमले कुल ७ सय १५ प्राप्त गरेको थियो । १२ समूहले भाग लिएको प्रतियोगिताको फाइनलमा आयोजकतर्फबाट सचिव प्रशान्त तामाङ र सदस्य प्रीति आलेले नेतृत्व गरेका थिए ।

त्यस्तै, सुन्दरबजारतर्फबाट पार्वती आले र विनोद धितालले नेतृत्व गरेका थिए ।

प्रतिष्ठानका केन्द्रीय सचिव जीवन दाहाल संयोजक रहेको निर्णायक मण्डलमा प्रतिष्ठान केन्द्रीय सदस्य तारानाथ आचार्य, प्रतिष्ठान गण्डकी प्रदेश सचिव राजकुमार कार्की र प्रतिष्ठान जिल्ला शाखा लमजुङका निवर्तमान अध्यक्ष दीपक पौडेल सदस्य थिए ।

प्रथम र द्वितीयलाई क्रमशः १० र ५ हजार पुरस्कार दिइएको प्रतिष्ठानका जिल्ला अध्यक्ष अनुज अधिकारीले बताए । तेस्रो हुने २ समूह बेसीशहर नगरपालिका र क्ब्होलासोथर गाउँपालिकालाई २ हजार ५ सय दरले पुरस्कृत गरिएको छ ।

उत्कृष्ट गायकमा पार्वती आले र सुरज दुतराज तथा उत्कृष्ट स्वरमा पूजा परियार पुरस्कृत भए ।

नवोदित प्रतिभा पुरस्कारबाट चिति संस्कृति कला केन्द्रका विशाल विकले पाएका छन् । विजयीलाई बेशीशहर नगरपालिकाका मेयर गुमानसिंह अर्यालले पुरस्कार र प्रमाणपत्र वितरण गरे ।

त्यस्तै, गायिका माया गुरुङ र गायक राजन परियारले ठाडोभाको प्रस्तुति राखेका थिए ।

Related News

सम्बन्धित समाचार

hero news full width