पोखरा । पोखरा–५, मालेपाटनस्थित वाराही माविमा आइतबार पूर्व विद्यार्थी मञ्च तदर्थ समिति गठन भएको छ ।
समिति संयोजकमा शिवराज बराल र सचिवमा माधवप्रसाद बराल छन् । सदस्य कपिलनाथ कोइराला, सुनिल उलक, विष्णुहरि अधिकारी, ठाकुर अधिकारी र शान्ता घिमिरे छन् ।

विद्यालयमा अध्ययनरत गरिब, विपन्न तथा असहाय विद्यार्थीलाई छात्रवृत्ति प्रदान गर्ने उद्देश्यले मञ्च गठन गरिएको समिति कपिलनाथ कोइरालाले जानकारी दिए । शैक्षिक गुणस्तर वृद्धिका लागि आगामी दिनमा रचनात्मक काम गर्दै जाने उनको भनाइ छ । मञ्चले छात्रवृत्तिका लागि ४ लाख ५० हजार रुपैयाँ संकलन गरिसकेको जनाएके छ । उनका अनुसार सहयोग आउन क्रम जारी छ ।

वाराहीमा एलएलसी ब्याच–२०४५ द्वारा ५ लाख ५० हजारको लागतमा अभिभावक कक्ष पनि निर्माण गरिएको छ । २०५० सालमा एसएलसी दिएका गोविन्द गौतमको सहयोगमा कक्षा १ देखि ३ सम्मका ६५ जना विद्यार्थीलाई तयारी पोशाक फागुन ३० गते सहयोग गरिने छ । आइतबार नै हिमालय आँखा अस्पतालको सहयोगमा विद्याथी, शिक्षक, कर्मचारीको आँखा परीक्षण गरियो । तीमध्ये १४ जनामा आँखाको समस्या देखिएको कोइरालाले जानकारी दिए । उनीहरुलाई २०३८ सालमा एसएलसी दिएका नेत्रराज गिरीले चश्मा सहयोग गर्ने भएका छन् ।

मञ्च गठन गर्ने क्रममा उनीहरुले आफ्नो पालामा पाइने खाजा खाएर पुरानो दिनको स्मरण गरे । पुरानो दिनको सम्झना गर्दै प्रअ शिव भण्डारी र विद्यालय व्यवस्थापन समिति अध्यक्ष विष्णुप्रसाद बराल पनि सोही विद्यालयको भूपू विद्यार्थी भएकाले विद्यार्थीसँगै पंक्तिबद्ध रही प्रार्थना गरेका थिए ।