फेवाताल पुर्ने गतिविधि तत्काल रोक्न माग

आदर्श समाज सम्वाददाता
फागुन २३, २०७७
fewa lak

पोखरा । पोखरा–१८, गैह्राको चौतारामा पानीको सतह घटेसँगै फेवाताल पुर्ने गतिविधि भइरहेकाले पोखराका विभिन्न सरोकारवाला संघसंस्थाको ध्यानाकर्षण भएको छ ।

एकातिर पानी सुक्ने र अर्को तर्फ फेवाताल पुर्ने काम भइरहेको भन्दै रत्न मन्दिर फेवाताल सरोकार समिति, नागरिक समाज, सिटिजन्स जुरी, राष्ट्रिय सम्पदा तथा जनअधिकार संरक्षण समिति लगायत संरक्षणकर्मीहरुले ध्यानाकर्षण जनाएका हुन् ।

सौन्दर्यकरणका नाममा जानाजान फेवातालको झण्डै २५ सय वर्ग फिट भूभाग मिच्नु भनेको फेवाताल माथिको अपराध मात्र नभई सम्मानित सर्वोच्च अदालतको मानहानी समेत रहेको उनीहरुको ठम्याइ छ ।

फेवातालमाथि भएको गम्भीर गल्तीलाई समयमै सच्चाइ तालविरोधी उक्त कार्य तत्कालै खारेज गर्न उनीहरुको माग छ । पुरिएको तालको भूभागबाट ढुंगामाटो लगायत सम्पूर्ण वस्तु उठाउन सम्बन्धित पक्षसँग आग्रह पनि गरेको छ । यसका लागि आवश्यक छानबिन गरी तालमाथि प्रतिकूल असर पार्ने गतिविधिमा संलग्न दोषीलाई कारबाही गर्न माग पनि गरेको छ ।

शनिबार रत्न मन्दिर फेवाताल सरोकार समितिका रामबहादुर पौडेल, नागरिक समाज कास्कीका इन्द्रकमल मानन्धर, सिटिजन्स जुरी कास्कीका अध्यक्ष वरिष्ठ अधिवक्ता तिलक पराजुली, राष्ट्रिय सम्पदा तथा जनअधिकार संरक्षण समितिका विष्णुहरि अधिकारी र संरक्षणकर्मी शशि तुलाचनले ध्यानाकर्षण गराएका छन् ।

Related News

सम्बन्धित समाचार

hero news full width