प्रदेश सरकार भूमिहीन, संघको जग्गामा पहिलाे भवन शिलान्यास

धनबहादुर गुरुङ
फागुन १८, २०७७
PM Oli Silanyas~850

पोखरा । गण्डकी प्रदेश सरकार स्थापना भएको ३ वर्ष पूरा भयो । संघ सरकार मातहत रहेका कार्यालय खाली गरेर प्रदेशको प्रशासनिक काम सुरु भयो । सीप विकास केन्द्रको बन्दै गरेको भवनलाई अन्तिम रुप दिएर मुख्यमन्त्री तथा मन्त्रीपरिषदको कार्यालय र अरु २ मन्त्रालय राखियो । अरु ससाना भवन खोजेर बाँकी ३ मन्त्रालय सञ्चालनमा आए ।
भवन तथा जमिन प्राप्तिका लागि प्रदेश सरकारले पहल नगरेको होइन । अचम्म लाग्दो त के छ भने प्रदेश सरकारका नाममा अहिलेसम्म १ आना जग्गा पनि छैन । न त एउटा भवन नै । प्रदेश सरकार विकास निर्माणका काम धमाधम गरिरहेको छ । मुख्यमन्त्री पृथ्वीसुब्बा गुरुङकै भनाइ सापटी लिने हो भने प्रदेश सरकार अहिले शिलान्यास भन्दा पनि उद्घाटनमा बढी लागेको छ । उनले यसले भन्दै गर्दा प्रदेश सरकार आफ्नै लागि भने एउटै भवन बनाएको थिएन ।

प्रधानमन्त्री केपी शर्मा ओलीलाई डाकेर प्रदेश सरकारले पहिलो भवन शिलान्यास गरेको छ । त्यहि पनि संघ सरकारकै नाममा रहेको जग्गामा प्रदेशले त भोगाधिकार मात्र पाएको छ । पोखराको नदीपुरस्थित जग्गामा गण्डकी प्रदेश प्रशिक्षण प्रतिष्ठानको भवन सोमबार शिलान्यास गरिएको हो । मुख्यमन्त्री गुरुङले अब प्रदेश सरकार धमाधम निर्माण जुट्ने बताएका छन् ।

नदीपुरस्थित जग्गामा गण्डकी प्रदेश प्रशिक्षण प्रतिष्ठानको भवन सोमबार शिलान्यास गरिएको हो

प्रदेश र स्थानीय तहका सरकारी र सार्वजनिक संस्थाका कर्मचारीहरुको क्षमता विकास र कार्यसम्पादनमा सहयोग गर्ने गरी प्रतिष्ठान स्थापना भएको हो । प्रशिक्षण व्यावसायलाई प्रशिक्षार्थीको कार्यसम्पादनसँग आवद्ध गराई सम्वन्धित संस्थाको समग्र कार्यसम्पादनमा सुधार गराउने प्रतिष्ठानको उद्देश्य रहेको प्रतिष्ठानका कार्यकारी निर्देशक ऋषिराम पाण्डे बताउँछन् । उनका अनुसार अध्ययन अनुसन्धानलाई प्रदेश तथा स्थानीय तहका नीति तथा कार्यक्रममा प्रयोग गरी प्रभावकारितामा अभिबृद्धि गर्ने कार्यमा प्रतिष्ठान केन्द्रित रहने छ । सबै तहका सरकार, राष्ट्रिय तथा अन्तर्राष्ट्रिय संघसँग हातेमालो प्रतिष्ठानले गर्ने पाण्डेले बताए । प्रशिक्षण र अनुसन्धानबाट संस्थागत सुशासन प्रवद्र्धन गर्न प्रतिष्ठान लाग्ने पाण्डेको तर्क छ ।

पहिलादेखि नै सञ्चालनमा रहेको प्रशिक्षण प्रतिष्ठान संघीयतापछि प्रदेश मातहत ल्याइएको हो । प्रदेश सरकारले ऐन नै बनाएर यो संस्थालाई क्रियाशील बनाएको छ । नदीपुरस्थित पुरानै संरचनामा गण्डकी प्रदेश प्रशिक्षण प्रतिष्ठानको आवासीय भवन निर्माणका लागि विस्तृत परियोजना प्रतिवेदन तयार भएको छ । स्केल आर्किटेक्ट प्रालिले तयार गरेको डिपिआर अनुसार भवन शिलान्यास भएको हो । डिपिआर अनुसार प्रतिष्ठान भवन निर्माणका लागि ५२ करोड ८४ लाख रुपैयाँ लाग्ने छ । करिब २० रोपनी जग्गामा बन्ने प्रतिष्ठानमा २ भवन रहने गरी डिपिआर तयार छ । मुख्य भवनको भूइँ तलामा ६ वटा समूहगत छलफल कक्ष रहनेछन् ।

४८/४८ सिटका ४ वटा तालिम हल, शैक्षिक कार्यालयसँगै प्रशासनिक कक्ष रहने गरी डिजाइन तयार पारिएको छ । तालिमकै लागि एक मुख्य हल पनि रहने छ । दोस्रो तलामा २६ कोठाको होस्टेल डिजाइन गरिएको छ । तेस्रो तलामा १२ वटा आवासीय कोठा हुनेछन् । चौंथो तलामा ७ वटा गेस्ट रुम, भिआइपी कोठा रहनेछन् । यसका साथै ध्यान गर्नका लागि कक्ष छुट्याइएको छ । हिमाली दृश्यावलोकनका लागि अग्गै ठाउँ बनाइएको छ । सहायक भवन २ तलाको हुनेछ । पहिलो तलामा ५ सय सिटको बहुउद्देश्यीय हल, भिआइपी होल्डिङ कक्ष तथा १ सय ५० सिटको लेक्चर हल बनाइने छ ।
सुविधासम्पन्न पुस्तकालय, एक पटकमा १ सय ६० जना अट्ने डाइनिङ हल, किचन र स्टोर पनि यही भवनको भुइँ तलामा बनाइने गरी डिजाइन तयार भएको छ । दुवै भवनको बेसमेन्टमा अन्डरग्राउन्ड पार्किङ रहने छ । ७० गाडीलाई एकैसाथ पार्किङ गर्न सकिने गरी गराइने छ । बेसमेन्टमा स्टोर तथा मर्मत स्टोर रहने छ ।

२ भवनको डिपिआर तयार भए पनि पहिलो चरणमा भने ३३ करोड २१ लाख ५५ हजार रुपैयाँ लागतको १ भवन मात्र बनाइने भएको छ । त्यतिका धेरै बजेट चाहिले भवनका लागि यो वर्ष भने साढे ६ करोड रुपैयाँमात्र विनियोजन गरिएको छ । प्रदेशको भौतिक पूर्वाधार विकास मन्त्रालयले निर्माण कार्यान्वयन गर्ने छ । प्रदेश सरकारले डेढ करोड रुपैयाँ विनियोजन गरेको छ भने प्रदेश तथा स्थानीय सहयोग कार्यक्रमअन्तर्गत प्राप्त सशर्त अनुदान ५ करोड रुपैयाँ यो वर्ष भवनका लागि छुट्टयाइएको हो ।

‘विकासका सूचकांकमा फड्को’
भवन शिलान्यास गर्दै प्रधानमन्त्री केपी शर्मा ओलीले राष्ट्रियस्तरमा पूर्वाधार निर्माणदेखि अन्तर्राष्ट्रियस्तरमा सम्बन्ध सुधार र विकासका सूचकांकमा समेत नेपालले फड्को मारेको दाबी गरेका छन् । प्रम ओलीले संयुक्त राष्ट्र संघले नेपाललाई अल्पविकशित राष्ट्रबाट विकशित राष्ट्रमा स्तरोन्नति गर्न सिफारिस गरेको बताए । यही गतिमा अगाडि बढ्ने हो भने सन् २०३० अगावै दीगो विकास लक्ष्य प्राप्ति हुने विश्वास व्यक्त गरे ।

सरकारको ‘समृद्ध नेपाल र सुखी नेपाली’को लक्ष्य हासिल गर्नका लागि सुशासन र विकासको बाटालाई अघि बढाइएको तथा शिक्षा, स्वास्थ्यलगायत हरेक क्षेत्रमा विकास बढेको बताए । आफ्नो ३ वर्षे कार्यकालमा विकासका काम अघि बढेको उनको भनाइ छ । विकास निर्माणको काममा स्वस्थ ढंगले प्रतिस्पर्धा गर्दै एकतावद्ध भएर हिड्नुपर्ने उनको धारणा थियो ।

गण्डकी प्रदेश आफूलाई लागि अति नै सुन्दर लाग्ने बताउँदै प्रदेश सरकारले पनि विकाशका काम अगाडि बढाएकोमा धन्यवाद दिए । नेपाल गरिब भए पनि तर मनका धनी बताउने ओलीले कोभिडविरुद्ध सफलता प्राप्त गर्ने विश्वका एक प्रतिशत देशभित्र नेपाल पनि परेको जिकिर गरे ।

प्रदेशका मुख्यमन्त्री पृथ्वीसुब्बा गुरुङले संघीयता कार्यान्वयनमा अरुभन्दा अब्बल गण्डकी प्रदेश रहेको सावित गर्न त्यही अनुसार काम गर्दै गएको बताए । प्रदेश आफैले बनाउन लागेको यो पहिलो भवन भए पनि अब धमाधम शिलान्यासका काम हुने उनले जनाए । संक्रामक अस्पताल, कास्कीको पुँडीटार र नवलपुरको लौकाहा खोलामा औद्योगिक क्षेत्र, पोखराका क्रिकेट रंगशाला अब छिटै शिलाल्यास हुने भन्दै यसका लागि प्रक्रियागत झन्झट मेटाइदिन उनले प्रधानमन्त्री समक्ष आग्रह गरे । प्रदेश विकासका लागि पर्यटन पहिलो शर्त रहेको भन्दै उनले अरु विषयवस्तुलाई समेत समट्दै अगाडि बढेको जानकारी उनले गराए ।

Related News

सम्बन्धित समाचार

    • सत्ता सहमतिमा मन्त्री नै वाधक !

      आदर्श समाज सम्वाददाता असार ६, २०७८
      पोखरा । नेपाली कांग्रेसका कृष्णचन्द्र नेपाली पोखरेलको नेतृत्वमा जेठ २९ मा बनेको सरकारले नीति तथा कार्यक्रम र बजेट ल्याइसकेको छ…
    • निगालोको चोया, जिउने सहारा

      धनबहादुर गुरुङ असार ६, २०७८
      पोखरा । छेवैमा ह्वील चियर विश्राम दिएर चेतबहादुर गुरुङ स्याँखु बुन्दैछन् । गत सातादेखि सुरु गरेको काम सक्नै आँटेका छन्…
    • विश्वासको मतपछि अब मन्त्रिमण्डल पुनर्गठन तयारी

      प्रकाश ढकाल असार ५, २०७८
      पोखरा । गण्डकीका नवनियुक्त मुख्यमन्त्री कृष्णचन्द्र नेपाली पोखरेलले विश्वासको मत पाएका छन् । उनले शुक्रबार राखेको प्रस्तावमा बहुमत सदस्यले पक्षमा मतदान…
    • मुख्यमन्त्री पोखरेलले आज विश्वासको मत लिँदै

      आदर्श समाज सम्वाददाता असार ४, २०७८
      पोखरा । गण्डकी प्रदेशका मुख्यमन्त्री  कृष्णचन्द्र नेपाली पाेखरेलले आज प्रदेश सभामा विश्वासको मत लिँदैछन् । जेठ २९ गते नेपालको संविधान…
    • भाग्दाभाग्दै सासू बुहारी च्यापिए पहिरोमा

      धनबहादुर गुरुङ असार ४, २०७८
      पोखरा । बिहानै ७ बजे घत्रक्क आवाज आयो, झ्यालबाट चिहाउँदा रुखहरु हल्लिएको जस्तो देखिन् । एकैछिनमै म्याग्दी मंगला गाउँपालिका ५…

    hero news full width

    sanil ads

    wordlink ads

    trending post

    ट्रेन्डिङ्ग