म्याग्दी । रघुगंगाको गाउँसभाले पुस १५ गते रघुगंगा नदीबाट पारिका भूगोल समेटेर थप नयाँ गाउँपालिका बनाउन अनुरोध गर्ने निर्णय ग¥यो । सोही बमोजिम पाँचौ जिल्ला सभाले पालिका र वडा थप्ने निर्णय गरेको छ । सम्बन्धित स्थानीय तहले गरेका वडा र पालिका विभाजनको निर्णय कार्यान्वयनका लागि संघीय सरकारका निकायमा सिफारिस गर्ने निर्णय गरिएको हो ।

धवलागिरि गाउँपालिकाको सभामा वडा ४, मुदी र ७ ताकमलाई २÷२ वटामा विभाजन गर्ने निर्णय भएको थियो । रघुगंगा गाउँपालिकालाई २ वटा पालिकामा विभाजन गर्ने गाउँसभाको निर्णय कार्यान्वयनका लागि सिफारिस गर्ने जिल्ला सभाले निर्णय गरेको छ ।

वडा ५ झिँ, वडा ६ पाखापानी र वडा ८, कुइनेवस्ती समेटेर पाखापानीमा केन्द्र रहने गरी नयाँ गाउँपालिका माग गर्ने निर्णय सिफारिसका लागि गाउँपालिका अध्यक्ष भवबहादुर भण्डारीले जिल्ला सभामा प्रस्ताव गरे ।

यसैगरी, ठूलो भूगोलमा छरिएका अन्नपूर्ण ५ शिख र वडा ७, हिस्तानलाई विभाजन गरेर २÷२ वटा वडा बनाउन सिफारिस भएको छ । सेवाप्रवाहमा नागरिकको सहज पहुँच र विकास निर्माणलाई व्यवस्थित गर्न वडा विभाजन सिफारिसका लागि अन्नपूर्णका अध्यक्ष क्याप्टेन डमबहादुर गर्बुजा पुनले प्रस्ताव गरेका थिए ।

सभाले गत आवमा भएका गतिविधि समेटिएको प्रगति प्रतिवेदन, चालू आवको बजेट स्वीकृत गर्नुका साथै प्रदेश सरकारबाट आउने बजेटको योजना तर्जुमा र कार्यान्वयन गर्ने अधिकार समन्वय समितिलाई दिने निर्णय गरेको छ । जिल्ला समन्वय समिति प्रमुख देवेन्द्रबहादुर केसीको अध्यक्षतामा भएको सभाले जिसस कोष र स्थानीय तहको साझेदारीमा सञ्चालित आयोजना कार्यान्वयनमा तदारुकता दिने, स्थानीय तहले गौरवका आयोजना अनुगमनका लागि जिससलाई विवरण उपलब्ध गराउने र विभिन्न विकास आयोजना सम्बद्ध प्रदेश तथा संघ सरकारका मन्त्रालयमा माग गर्ने निर्णय पनि गरेको छ ।

हाल काठमाडौंको मदन पुरस्कार गुठीमा रहेको बेनी आक्रमणको चिनो मानिएको गोली लागेर छियाछिया भएको विद्युत् पोल जिल्लामा ल्याएर संरक्षणसँग पर्यटन प्रवद्र्धनमा प्रयोग गर्ने निर्णय समेत भएको छ । ढिलासुस्ति भएका विकास आयोजना निर्माणलाई तीव्रता दिन समन्वय, अनुगमन र सहजीकरण गर्ने विषयमा जनप्रतिनिधिबीच छलफल भएको थियो ।

बेनी–जोमसोम, बेनी–दरवाङ, गलेश्वर पिप्ले भगवती, पोखरेबगर घार चित्रे लगायत सडक, नदी नियन्त्रण, खानेपानी लगायत ढिलासुस्ती भएका आयोजनालाई गति दिन अनुगमन र सम्बद्ध निकायमा पहल गर्ने विषयमा सभामा छलफल भएको थियो ।

धवलागिरि गाउँपालिका अध्यक्ष थमसरा पुनले विषयगत कार्यालयले समन्वय नगरेको, विद्युत्, पूर्वाधार विकासका योजना अलपत्र परेको भन्दै ध्यानाकर्षण गराएकी थिइन् । म्याग्दीको सबै क्षेत्रमा हिमाली जिल्लाको मापदण्ड लागू गरेर सेवासुविधा लागु गर्न संघीय सरकारसमक्ष माग गरिएको छ । गत वर्ष म्याग्दीलाई हिमाली जिल्लामा सूचीकृत गरिए पनि आरक्षण कोटा, कर्मचारीको सेवासुविधा र अन्य विषयमा लागु भएको छैन । पहिरो पीडितको घर पुनर्निर्माणका लागि हिमाली जिल्लाको सुविधा कार्यान्वयन भएको छ ।

कार्यक्रममा जिल्ला समन्वय समितिका निमित्त अधिकारी आकांक्षा रिजालले गत आर्थिक वर्षमा गरेका मुख्य क्रियाकलाप र चालू आवको लागि प्रस्तावित बजेट तथा कार्यक्रम पेस गरेकी थिइन् । चालु आवमा जिससलाई विभिन्न शीर्षकमा १ करोड ३६ लाख ३९ हजार रुपैयाँ बजेट प्राप्त भएको छ ।