आँबुखैरेनी । नेपाल आदिवासी जनजाति पत्रकार महासंघ (फोनिज) गण्डकी प्रदेश समितिको आयोजनामा तनहुँको आँबुखैरेनीमा ‘सञ्चार प्रविधिको विकास र अबको पत्रकारिता’ विषयक अन्तरक्रिया भएको छ ।

आँबुखैरेनी गाउँपालिका र आन्तरिक मामिला तथा कानून मन्त्रालय गण्डकी प्रदेशको सहयोगमा भएको अन्तक्र्रिया कार्यक्रम उद्घाटन गर्दै आन्तरिक मामिला तथा कानूनमन्त्री हरिबहादुर चुमानले प्रदेश सरकारले होमस्टेको प्रवद्र्धनलाई प्राथमिकतामा राखेर आफ्ना कार्यक्रम अगाडि सारेको जनाए ।
अहिलेको युग सूचना तथा प्रविधिको युग भएकाले सोही अनुरुप सबै क्षेत्र र मिडियाकर्मीहरु पनि अपडेट हुनुपर्ने उनको भनाइ छ । उनले पत्रकार स्वयं जिम्मेवार र सचेत हुनुपर्नेमा जोड दिँदै प्रदेश आमसञ्चार ऐनको आवश्यकता औल्याए ।

गण्डकी प्रदेशका ११ जिल्लाबाट १०/१० वटा स्थानलाई पर्यटकीय गन्तव्य छनोट गरिएको बताउँदै तनहुँबाट छिम्केसरी र आँधीमूल सूचीकृत भएको जानकारी दिए ।

तनहुँका प्रमुख जिल्ला अधिकारी सागर आचार्यले अन्तरक्रियाबाट मिडियाकर्मीले बढी मात्रामा ज्ञानगुणका कुरा ग्रहण गरेर आगामी दिनमा सोही अनुरुप कलम चलाउनेमा विश्वास व्यक्त गरे ।

आँबुखैरेनी गाउँपालिकाका प्रमुख गिरबहादुर थापाले मिडियाले सही तथ्यांक र सूचनामा टेकेर समाचार सम्प्रेषण गर्नुपर्ने बताए ।

गाउँपालिका उपप्रमुख पुष्पा देवी श्रेष्ठले आँबुखैरेनी गाउँपालिकाभित्रका पर्यटकीय गन्तव्य पहिचान हुन नसकेको बताउँदै पहिचान भएका पर्यटकीय गन्तव्यको प्रवद्र्धनमा मिडियाले सहयोग गर्न आग्रह गरिन् ।

फोनिज गण्डकी प्रदेश इन्चार्ज हुमबहादुर गुरुङले अन्य क्षेत्रमा जस्तै पत्रकारितामा समेत जातीय विभेद रहेको टिप्पणी गरेका थिए ।
अन्तक्र्रियामा ग्लोबल मल्टिमिडिया जर्नालिष्ट रजनीश भण्डारीले कार्यपत्र प्रस्तुत गरेका थिए ।

फोनिज गण्डकी प्रदेश अध्यक्ष एमबी आस्था मगरको अध्यक्षतामा भएको कार्यक्रममा संस्थाका सचिव खीमा गुरुङले स्वागत र सदस्य सुनिता रानाले सञ्चालन गरेकी थिइन् ।