बालुवा डाँडाबाट उड्यो प्याराग्लाइडिङ

कावासोतीमा प्याराग्लाइडिङको सफल परीक्षण

रामकुमार श्रेष्ठ
फागुन ७, २०७७
PARA

नयाँ नयाँ पर्यटकीय गन्तव्य पहिचान गर्ने उद्देश्य साथ कावासोती नगरपालिकाको सहयोगमा बिहीबार कावासोतीमा प्याराग्लाइडिङको सफल परीक्षण भएको छ । नवलपुरको कावासोती नगरपालिका–१ स्थित बालुवा डाँडाबाट भएको परीक्षण उडान सफल भएको हो । बालुवा डाँडाबाट उडेका प्याराग्लाइडिङ कावासोती–१ मा रहेको पोखरीतालमा ल्यान्ड गरेका हुन् ।

पहिलो दिन ३ वटा सफल परीक्षण उडान भएको छ । पाइलट हरि थापाले पहिलो उडान गरेका थिए । त्यसपछि थप पाइलट सहित टेन्डमसहित थप २ वटा उडान गरिएको थियो ।

९२७ मिटर उचाइको बालुवा डाँडा क्षेत्र हावाको वहाव, उडान र ल्यान्डिङ क्षेत्र सबै दृष्टिले प्याराग्लाइडिङको लागि उपयुक्त रहेको पाइलट हरि पहारी बताए ।

कावासोतीका युवाको सक्रियता र नगरपालिकाको सहयोगमा गरिएको परीक्षण उडान सफल भएपछि यस क्षेत्रमा नियमित प्याराग्लाइडिङको सम्भावना बढेको कावासोती नगरपालिकाका उपप्रमुख प्रेमशंकर मर्दनियाले बताए । उनी प्याराग्लाइडिङ हुने स्थान बालुवा डाँडामा पुगेका थिए ।

कावासोती नगरपालिका प्रमुख चन्द्रकुमारी पुन र प्रमुख प्रशासकीय अधिकृत यज्ञ पुरीले ल्यान्डिङ क्षेत्र पोखरी ताल पुगेर पाइलट दललाई स्वागत गरेका थिए ।

नगर प्रमुख पुनले कावासोती नगरपालिकामा पर्यटकीय दृष्टिले हरेक सम्भावना रहेको भन्दै योजना अगाडि बढाउने युवालाई नगरपालिकाले सक्दो सहयोग गर्ने प्रतिबद्धता जनाइन् ।

कावासोतीका युवाले स्थानीय उमेश रानाको अध्यक्षतामा बालुवा डाँडा प्याराग्लाइडिङ युवा समूह गठन गरेर यहाँको सम्भावनाबारे अध्ययन थालेपछि नागरिक उड्यान प्राधिकरणबाट परीक्षण उडानको अनुमतिप्राप्त र कावासोती नगरपालिकासँगको सहकार्यमा सुरु गरिएको समूह सचिव बिमल रानाले बताए ।

Related News

सम्बन्धित समाचार

    hero news full width

    sanil ads

    wordlink ads

    trending post

    ट्रेन्डिङ्ग