पोखरा, ६ मंसिर । गुल्मीको रेसुङ्गामा बुधबार साँझ जिप दुर्घटना हुँदा ३ जनाको मृत्यु भएको छ । दुर्घटनामा ७ जना घाइते छन् ।

सदरमुकाम तम्घासबाट पराल्मी जाँदै गरेको लु १ ज १९८८ नं को जिप बुधबार साँझ ६ बजेतिर दुर्घटनामा परेको हो ।

दुर्घटनामा रेसुङ्गा १४ ठुलोपधेँराका २७ वर्षीया गोमा नेपाली, २८ वर्षीया शान्ति नेपाली र ४८ वर्षीय एकराज पोखरेलको मृत्यु भएको हो । तीमध्ये पोखरेलको घटनास्थलमै र अन्य २ को गुल्मी अस्पतालमा उपचारक्रममा मृत्यु जिल्ला प्रहरी कार्यालय गुल्मीले जनाएको छ । घाइते ७ मध्ये गम्भीर २ जनालाई पाल्पा रेफर गरिएको छ भने ५ जनाको गुल्मी अस्पतालमा उपचार भइरहेको छ । जिपचालक भरत पोखरेल समेत घाइते छन् ।

जिपमा सवार २ जना भने हाम फालेर बाँच्न सफल भएका छन् । कच्ची सडक भएको र पानी परेको हुँदा जिप चिप्लिएर दुर्घटनामा परेको हुन सक्ने गुल्मीका प्रहरी नायव उपरीक्षक पुरुषोत्तम पाण्डेले जानकारी दिए ।