पोखरा । प्रथम टाइगर कप आमन्त्रण राष्ट्रिय क्लब भलिबल च्याम्पियनसिप २०७७ अन्तर्गत तेस्रो दिन बिहीबार एपिएफ, न्यु डायमन्ड र आर्मी विजयी भएका छन् । पोखरा रंगशालामा भएको महिलातर्फको खेलमा एपिएफ र न्यु डायमन्ड तथा पुरुषतर्फ आर्मी विजयी भएको छ ।

पहिलो खेलमा आर्मीलाई एपिएफले ३–२ को सेटमा पराजित गरेको हो । निकै प्रतिस्पर्धात्मक खेलमा पहिलो सेट २५–१८ ले जितेको थियो । दोस्रो सेट एपिएफले २७–२५ र तेस्रो सेट २५–१७ ले जितेको हो । चौथो सेट भने आर्मीले २५–२० मा जित्यो । फाइनल सेट १५–७ एपिएफले जितेको हो ।

महिला तर्फको दोस्रो खेलमा न्यु डायमन्डले नेपाल पुलिस क्लबलाई ३–१ सेटले हराएको हो । पहिलो सेट न्यु डायमन्डले २७–२५ ले हराएपनि दोस्रो सेट ३१–२९ ले पुलिसले जितेको थियो । तेस्रो र चौथो सेट न्यु डायमन्डले क्रमश २७–२५ र २५–१६ ले पराजित गरेको हो ।

शुक्रबार ३ खेल हुनेछ । पुरुष तर्फको पहिलो खेलमा गण्डकी प्रदेश र एपिएफ भिड्नेछ भने दोस्रो खेलमा नेपाल पुलिस क्लब र आर्मी क्लब बिच खेल हुनेछ । महिला तर्फ भने न्यु डायमन्ड र एपिएफ बिच खेल हुनेछ ।

पुरुष तर्फको खेलमा आर्मीले एपिएफलाई ३–० को सोझो सेटमा हराएको हो । आर्मीले एपिएफलाई २५–२१, २५–२३ र २५–१८ को सेटमा पराजित गरेको हो । आगामी फागुन १ गतेसम्म सञ्चालन हुने प्रतियोगिताको विजेता महिला तथा पुरुषले समान १ लाख ५० रुपैयाँ हजार, ट्रफी, मेडल, प्रमाणपत्र तथा उपविजेताले ७५ हजार र तृतीयले २५ हजार रुपैयाँ पुरस्कार प्राप्त गर्ने टाइगर ग्रुपका महासचिव प्रकाश बरालले जानकारी दिएका छन् ।

यसैगरी सर्वोत्कृष्ट महिला तथा पुरुष खेलाडीले समान २०–२० हजार प्राप्त गर्नेछन् । उत्कृष्ट सर्भर, उत्कृष्ट सेटर, उत्कृष्ट ब्लकर, उत्कृष्ट डिफेण्डर तथा स्पाइकर महिला तथा पुरुष खेलाडीले समान रु पाँच हजारका दरले पुरस्कार प्राप्त गर्ने आयोजक संस्थाका अध्यक्ष नारायण शर्माले जानकारी दिएका छन् ।