पोखरा । लामो समयदेखि युवायुवतीले गाडीको लाइसेन्स लिन पाएका छैनन् । कहिले लकडाउन त कहिले के वाहाना । अनि दरखास्तका लागि अनलाइन फारम भर्ने भनिए पनि प्राविधिक गडबडी भन्दै प्रभावकारी हुन सकेको छैन ।

यातायातकै कर्मचारीलाई भनसुन गरेदेखि गाडी, मोटरसाइकल र स्कुटरको लाइसेन्स पाइन्छ भनिन्छ । यसमा भित्रकै कर्मचारीले सेटिङ गरेको सुन्नमा पनि आउँछ कहिले काँही । कर्मचारीसँग सेटिङ मिलाउन यातायातमा ठूलै गिरोह सक्रिय छ । ती गिरोहका कतिपय सदस्यले पैसा लिएर काम फत्ते पनि गरिदिएका छन् । कति त पैसा तिरपछि पनि अनि झुलाउने र अन्त्यमा काम नै नहुने समस्याबाट आजित छन् ।

यस्ता काममा ड्राइभिङ स्कुल सञ्चालक नै क्रियाशील हुने गरेको पाइएको छ । यस्तै आरोपमा पक्राउ परेका छन् पोखराको चाउथेस्थित मेट्रो ड्राइभिङ स्कुल एन्ड प्रि टेस्ट सेन्टर सञ्चालक ४९ वर्षे खगेन्द्रप्रसाद काफ्ले ।

यातायात कार्यालयका कर्मचारीसँग चिनजान छ । ट्रायल टेस्टमा फेल भए पनि सजिलै लाइसेन्स निकालिदिन्छु भनेर विभिन्न व्यक्तिलाई ठगी गरेको उजुरीका आधारमा काफ्ले पक्राउ परेको जिल्ला प्रहरी कार्यालय कास्की प्रवक्ता डिएसपी सुवास हमालले बताए ।

उनको साथबाट विभिन्न कागजपत्र, लाइसेन्स ३ थान, विभिन्न नमुना प्रश्नपत्र, नगद ९० हजार, मोबाइल २ वटासहित वरामद गरिएको छ । उनलाई जिल्ला अदालत कास्कीबाट ठगी सम्बन्धी कसुरमा १० दिन म्याद थपेर अनुसन्धान भइरहेको प्रहरीले जनाएको छ ।