भोकको झोंकमा पत्नीको टाउकोमा बन्चरो

Avatar आदर्श समाज सम्वाददाता
माघ २३, २०७७
murder

पोखरा । अधिकांश समय घर बाहिर हुन्थे । कृषि फर्ममा काम गर्ने पोखरा ३३ पुँडीका गमबहादुर पुन बिहीबार साँझ घर आए । पत्नीलाई खाना पकाउन अह्राए । साँझ ७ बजे नै पत्नी हरिमाया रक्सी पिएर बसिरहेकी थिइन् । हरिमायाले खाना बनाउन मानिनन् । केहीबेर भनाभन भयो ।

प्रहरीले गरेको ब्रिफिङ अनुसार खाना नपकाएकै रिसमा गमबहादुरले हत्या गरे । ‘हरिमायाले सँधैजसो रक्सी खाने गरेको पाइयो । सँधैजसो खाना नपकाउने र झगडा भइरहने रहेछ,’ कास्की प्रहरी प्रमुख एसपी जीवन श्रेष्ठले भने, ‘अरु पारिवारिक समस्या पनि देखियो । तर अनुसन्धान भइरहेको छ । हत्याको मुख्य कारण चाहिँ खाना नपकाएकै विवादबाट भएको रहेछ ।’

गमबहादुर शुक्रबार बिहानै लामगादीको कृषि फार्मबाट समातिए । उनीसँगै हत्या गर्दाको बेला लगाएको कपडा र पत्नीलाई हिर्काएको बन्चरो समेत प्रहरीले बरामद गरेको छ । एसपी श्रेष्ठका अनुसार गमबहादुरले पत्नीलाई बन्चरोले हानेका थिए । हरिमायाको टाउकोमा गम्भीर चोट थियो । अत्यधिक रगत बगेर उनको घटनास्थलमै मृत्यु भएको प्रहरीले जनाएको छ । गमबहादुरले पत्नी मरेको थाहा नपाएको बयान दिएका छन् । ‘झगडा भएको हो । रिसको झोकमा हानिदिएँ, प्रहरीसँगको बयानमा उनले भनेका छन्, ‘म बिहानै उठेर काममा गएँ । पत्नी मरेको थाहा थिएन ।’

हत्या अभियोगमा ५० वर्षका गमबहादुरलाई कास्की जिल्ला अदालतबाट १० दिनको म्याद थप गरी अनुसन्धान अघि बढाइएको छ । पर्वतको जलजला स्थायी घर भएका उनीहरु ३० वर्षदेखि ब्लकको अस्थायी घर बनाएर पुँडीमा बस्दै आएका छन् । हत्याको समयमा परिवारका अरु सदस्य भने घरमा थिएनन् । मृतक हरिमाया ४२ वर्षकी हुन् । प्रारम्भिक अनुसन्धानमा पति÷पत्नीबीच धेरै बेमेल भएको देखिएको छ । कास्कीमा पारिवारिक बेमेलका कारण हत्या हुने क्रम रोकिएको छैन ।

Related News

सम्बन्धित समाचार

    hero news full width

    sanil ads

    wordlink ads

    trending post

    ट्रेन्डिङ्ग