पोखरा । उमेरले मात्र १९ वर्षीया एमिलिया सुप्रिया पालिखेले ‘द लभ वि वान्ट’ पुस्तक लेखेकी छन् । नेपालमै सबैभन्दा कान्छो उमेरमा अंग्रेजी भाषामा पहिलो उपन्यास लेखिएको दाबी गरिएको छ ।

कृतिको शनिबार लोकार्पण भएको छ । लोकार्पण समारोहमा प्राज्ञ रमेश श्रेष्ठले प्रेमको महाभारतमा सुप्रियाले एक अध्याय लेखेको भन्दै आगामी यात्राको लागि पनि शुभकामना दिए ।

पोखरा उद्योग वाणिज्य संघ पूर्व अध्यक्ष विश्वशंकर पालिखेले सुुप्रियाको प्रयासप्रति खुसी व्यक्त गर्दै अझ सफलताको शुभकामना दिए ।

नेपाल पत्रकार महासंघ कास्की अध्यक्ष दीपेन्द्र श्रेष्ठले सानै उमेरमा यति धेरै शव्दसँग खेल्नु स्रष्टाको ठूलो कार्य भएको बताए । उनको उदय पालिखे खानदानका लागि मात्र नभएर पोखराकै लागि गौरवको विषय भएको औंल्याए ।

रेडियो अन्नपूर्णका प्रबन्ध निर्देशक सुनयना पालिखेले यो उपन्यास टिन एजर्सका लागि पठनीय सामग्री हुने विश्वास व्यक्त गरिन् । उनले उपन्यासकार सुप्रियाका हजुरबुवा शिक्षासेवी गणेशमान पालिखे, जिजुबुवा दयाशंकर पालिखेको पनि योगदानको स्मरण गरिन् ।

नागढुंगा युवा क्लब अध्यक्ष पत्रकार विनोद लामिछानेले आफ्नै टोलबाट उदियमान साहित्यकारको उदय भएकोमा खुसी व्यक्त गर्दै सफलताको शुभकामना दिए ।

स्रष्टा सुप्रियाले उपन्यास पढ्दै गर्दा पाठकले आफू टिनएजमै फर्किएको महसुस गर्ने उल्लेख गरिन् । यो उमेरमा पलाउने इच्छा, चाहना, मायाको भाव पुस्तकमा समेटेको उनले बताइन् । लडाउनलाई अर्थपूर्ण रुपमा सदुपयोग गर्न आफूले यो पुस्तक लेखेको उनले सुनाइन् ।

स्रष्टाका हजुरआमा गंगादेवी पालिखेको अध्यक्षतामा भएको कार्यक्रमको सञ्चालन सञ्चारकर्मी गीता रानाले गरेकी थिइन् ।