कास्कीमा सुरू भयाे चुनावकाे तयारी

Avatar आदर्श समाज सम्वाददाता
माघ १४, २०७७
Nirbachan Aayog 1

पोखरा । प्रतिनिधि सभा विघटनका बारेमा सर्वोच्च अदालतमा दिनहुँ बहस चलिरहेका बेला निर्वाचन आयोगले भने जिल्ला तहमै चुनावको तयारी थालेको छ । सरकारले आगामी वैशाख १७ र २७ गते निर्वाचन घोषणा गरेपछि आफूहरुले तयारी सुरु गरेको कास्कीका जिल्ला निर्वाचन अधिकारी भीमसेन कार्कीले जानकारी दिए ।

मंगलबार अन्तरक्रिया गरी कार्यालयले जिल्लामा मतदाता नामावली अद्यावधिक कार्य माघ १५ देखि सुरु गर्ने जानकारी दिएको हो । उक्त समयमा मतदाता नामावलीविरुद्ध दाबी विरोध गर्न सक्ने पनि जानकारी दिएको छ । मतदाता नामावली अद्यावधिक कार्यक्रम स्थानीय तहको केन्द्रलाई आधार मानी सञ्चालन गरिने कार्कीको भनाइ छ । कार्यक्रम स्थानीय तहमा माघ १५ देखि २१ गतेसम्म र जिल्लामा माघ १५ गतेदेखि २६ गतेसम्म सञ्चालन हुनेछ ।

२०७४ को निर्वाचनपछि कास्कीमा ९ हजार ९ सय ४२ जना मतदाता थपिएका छन्

अद्यावधिक कार्यको लागि प्रत्येक गाउँपालिकामा सहायक नाम दर्ता अधिकारी पठाइसकिएको उनले जानकारी दिए । मादी गाउँपालिकामा सञ्जयप्रसाद बराल, रुपामा अशोक परियार, माछापुच्छ«ेमा विष्णुप्रसाद अधिकारी, अन्नपूर्ण गाउँपालिकामा खुमादेवी रेग्मी र पोखरा महानगरपालिकामा मञ्जु ढुंगाना सहायक नाम दर्ता अधिकारी तोकिएको कार्कीले जानकारी दिए ।

विसं २०७७ पुस ५ गतेसम्म १८ वर्ष पूरा भएकाहरुको मात्र अद्यावधिक गरिने उनले बताए । ‘पुस ५ गते १८ वर्ष पूरा भएकाहरुको मात्र नाम दर्ता गरिनेछ,’ उनले भने, ‘त्योपछि उमेर पुगेको हो भने हामीले केही गर्न मिल्दैन ।’ नामावलीमा भएका दोहोरोपन एवं त्रुटि हटाउन सहयोग पुगोस् भनेर कार्यक्रम सञ्चालन गर्न लागिएको कार्कीको भनाइ छ । ‘आफ्नो नाम विवरण हेर्न पनि कार्यालले कार्यक्रम अगाडि बढाएको हो,’ उनले भने, ‘ यसले मतदाता नामावलीलाई वैधानिकता प्रदान गर्नेछ ।’

मतदाता नामावलीमा रहेको त्रुटि सच्याउने, नाम उपर विरोधमा उजुरी दिने, दोहोरो नाम हटाउने, मृत्यु भएका र नागरिकता त्याग गरेकाको नाम हटाउनको लागि निवेदन दिने समय माघ १६ देखि १८ गतेसम्म समय तोकिएको छ । यसैगरि २०७४ को निर्वाचनपछि कास्कीमा ९ हजार ९ सय ४२ जना मतदाता थपिएका छन् । योसँगै कास्कीमा मतदातको संख्या २ लाख ६५ हजार ३ सय ९६ मतदाता छन् । जसमा पुरुषको संख्या १ लाख २४ हजार ६ सय ३१ र महिलाको संख्या १ लाख ४० हजार ७ सय ६१ छ भने तेस्रो लिंगीको संख्या ४ जना छ । ‘यो संख्या पुस ५ गतेसम्मको दाबी विरोध गर्नुपूर्वको हो,’ उनले भने, ‘दाबी विरोधपछि केही मात्रामा घट्नसक्छ ।’ कास्कीको क्षेत्र नम्बर १ मा १ लाख ७ सय १६, क्षेत्र नम्बर २ मा ७२ हजार ९ सय ३३ र क्षेत्र नम्बर ३ मा ९१ हजार ७ सय ४७ मतदाता संख्या छन् ।

पोखरा महानगरपालिकामा १ लाख ९८ हजार ६ सय ६३, माछापुच्छ«े गाउँपालिकामा १८ हजार ६ सय ५४, अन्नपूर्णमा १८ हजार ३ सय ४९, मादीमा १६ हजार ४ सय ८७ र रुपामा १३ हजार २ सय ४३ मतदाता छन् । निर्वाचन कार्यालय कास्कीका अनुसार जिल्लाभर १ सय ५० मतदान स्थल र ३ सय १७ मतदान केन्द्र छन् ।

Related News

सम्बन्धित समाचार

    hero news full width

    sanil ads

    wordlink ads