पोखरा । सरकारले निशुल्क वितरण गर्ने कोरोना विरुद्धको भ्याक्सिन गण्डकी प्रदेशमा आइपुगेको छ । भारतबाट अनुदानमा प्राप्त खोप नेपाल सरकारले समानुपातिक रुपमा प्रदेश तहमा वितरण गरेको हो ।

‘कोभिसिल्ड’ नामक खोप आइतबार साँझ पोखरा ल्याइएको छ । सबै खोप प्रदेशको स्वास्थ्य आपुर्ति व्यवस्थापन केन्द्र अन्तर्गत कोल्ड स्टोरमा राखिएको छ । अहिले ४० हजार डोज खोप ल्याइएको सरकारले जनाएको छ । पहिलो चरणमा गण्डकीका १७ हजार भन्दा बढीले खोप पाउने छन् । सरकारले तयार गरेको विवरण अनुसार १७ हजार ३ सय ९६ जना ‘फ्रन्ट लाइनर’ लाई खोप लगाउन लागिएको हो । पोखरा आइपुगेको खोप सोमबार प्रदेशका ११ वटै जिल्लामा पु¥याइने आपुर्ति व्यवस्थापन केन्द्र गण्डकीका निर्देशक खीम खड्काले जानकारी दिए । गण्डकीमा खोप राख्ने कोल्ड स्टोरको अभाव छैन । सबै ठाउँमा आवश्यक्ता अनुसार भण्डारण केन्द्र रहेको खड्काको भनाइ छ । ‘प्रदेशका सबै जिल्लामा अहिले पनि बालबालिकाहरुको खोप कार्यक्रम छ । त्यसैले गर्दा सप्लाई र भण्डारणमा कुनै समस्या देखिएन,’ उनले भने ।

पहिलो चरणमा निर्देशिका अनुसार नै स्वास्थ्यकर्मी, एम्बुलेन्सकर्मी, सुरक्षाकर्मी, सरसफाईकर्मी लगायत कोभिड नियन्त्रणको अग्रभागमा रहेर काम गर्नेहरुलाई खोप लगाइने छ । ‘सोमबार सबै जिल्लाको खोप केन्द्रमा पुग्छ । १४ गते विहान १० वजे प्रत्येक जिल्लाका कम्तिमा एउटा अस्पतालबाट खोप लगाउन सुरु हुन्छ,’ उनले भने, ‘त्यो अनुसारको सबै तयारी भइसकेको छ । खोप कार्यक्रम १ सातासम्म चल्छ ।’ मनाङ र मुस्ताङ टाढा भएकोले ढुवानीमा समस्या पर्ने उनको भनाइ छ ।

पोखराका ३ वटा अस्पतालबाट कोरोनाको खोप लगाउने तयारी भएको स्वास्थ्य निर्देशनालय गण्डकीका निर्देशक डा. विनोदविन्दु शर्माले जानकारी दिए । पश्चिमाञ्चल अस्पताल, मनिपाल अस्पताल र संक्रामक तथा सरुवा रोग अस्पतालबाट खोप वितरण हुनेछ । अन्य जिल्लामा जिल्ला अस्पतालबाट खोप दिइने छ । प्रदेशमा खोप दिनका लागि पूर्व तयारी पनि थालिएको छ । १० जना प्रशिक्षकले तालिम लिइसकेका छन् । उनीहरुले जुममार्फत जिल्लाका स्वास्थ्य कर्मीलाई तालिम दिने कार्यक्रम छ । खोप चिकित्सकका निगरानीमा लगाइने शर्माको भनाइ छ ।

‘१ पटक दिएपछि ठिक १ महिनापछि अर्को डोज दिनुपर्छ । सामान्य खोपजस्तो होइन । चिकित्सकको निगरानीमा भ्याक्सिन दिनुपर्छ,’ उनले भने, ‘स्वास्थ्यकर्मी पहिलो कित्तामा हुनुहुन्छ । त्यसपछि सर्वसाधारणमा जाने हो । १ दिनमा १ सय २५ जनाभन्दा बढीलाई खोप लगाइँदैन ।’

खोप कार्यक्रमका लागि प्रदेशका प्रमुख सचिवको नेतृत्वमा उच्चस्तरीय समिति गठन गरिएको छ । यो खोप शरीरमा एलर्जी भएका, गर्भवती, सुत्केरी, बच्चालाई दूध चुसाइरहेकी आमा र १८ वर्षभन्दा कम उमेरका कुनै पनि व्यक्तिले लगाउनु हुँदैन ।

गण्डकी प्रदेशमा हालसम्म १५ हजार ३ सय ३८ जना कोरोनाबाट संक्रमित भएका छन् । उनीहरुमध्ये १४ हजार ६ सय ७१ जनालाई निको भइसकेको छ । प्रदेशभरि २ सय ३ जनाको मृत्यु भएको छ । अहिले सक्रिय संक्रमितको संख्या ७३ रहेको गण्डकी स्वास्थ्य निर्देशनालयले जनाएको छ । गण्डकीका ११ जिल्ला मध्ये गोरखा, मनाङ र मुस्ताङ कोरोना संक्रमण मुक्त छन् । कोरोना संक्रमितको दर कम भए पनि संक्रमणको जोखिम यथावत रहेकोले स्वास्थ्य मापण्ड पूर्ण रुपमा पालना गर्न स्वास्थ्यकर्मीहरुको सुझाव छ ।