पोखरा। गुरुङ ब्युटी पार्लर एण्ड एकेडेमी प्रालिले महेन्द्रपुलमा थप शाखा बिस्तार गर्ने भएको छ । कम्पनी सञ्चालक महिलाउद्यमी चिनु गुरुङले ‘सिजी ब्रोज एण्ड नेल्स’ सञ्चालनमा ल्याउन लागेकी हुन् । शाखाको माघ १२ गते उद्घाटन गरिने शनिबार आयोजित पत्रकार सम्मेलनमा गुरुङले जानकारी दिइन् ।

महेन्द्रपुलस्थित एस. लोटस भवनमा सञ्चालन हुने सो शाखा विशेषगरी १६ औं श्रृंगारमध्ये महत्वपूर्ण अंग आँखा, हात, खुट्टा, नङको सौन्दर्यलाई मध्यनजर गरिनेछ । अभिनेत्री आचल शर्माले उद्घाटन गर्ने सो शाखाबाट १० जना कर्मचारीले सेवा दिने छन् ।

‘सिजी ब्रोज एण्ड नेल्स’ मा विदेश अध्ययन गर्न जाने विद्यार्थीका लागि नेल टेक्निसियन र लस ब्रो टेक्निसियल कोर्स गरी सीप सिकाएर दक्ष बनाइने लक्ष्य रहेको जनाइएको छ । सौन्दर्य व्यवसायको क्षेत्रमा झण्डै ३ दशक लामो अनुभव सँगालेकी गुरुङले प्राविधिक शिक्षालाई बृहत् बनाउँदै बेरोजगार दर घटाउने र आर्थिक रुपमा सशक्त बनाउने आफ्नो अभियानमा एउटा इँट्टा भएको बताइन् ।

पोखरा न्यूरोडमा प्रधानकार्यालय रहेको गुरुङ ब्युटी पार्लर एण्ड एकेडेमी प्रालिले यसअघि पृथ्वीचोक, भाटभटेनी, बगर, महेन्द्रपुल, दुलेगौंडामा शाखा बिस्तार गरिसकेको छ । सबै शाखामा गरी ४६ जनाले रोजगार पाएका छन् ।
आधुनिक समयको माग अनुसार अत्याधुनिक सेवा सुविधासहित महिलालाई नेल श्रृंगार, आइब्रो श्रृंगार र मेकअपसम्बन्धी तालिम इन्स्टिच्युटमा दिइनेछ । एकेडेमीमा गरिब तथा जेहन्दार विद्यार्थीलाई विशेष छुट व्यवस्था पनि छ ।

२०५० सालमा भारतको मन्द्रासबाट सौन्दर्य तालिम लिएकी चिनु गुरुङ २०५२ मा ३० हजार लगानीमा पृथ्वीचोकमा गुरुङ व्युटीपार्लर स्थापना गरी यो क्षेत्रमा होमिएकी हुन् । हालसम्म हजारौं विद्यार्थीलाई सौन्दर्य शिक्षा दिएको बताउने उनी पोखरा उद्योग वाणिज्य संघको निवर्तमान उपमहासचिव पनि हुन् ।