पोखरा । नेपाल पुस्तक तथा स्टेशनरी व्यवसायी महासंघ चितवन शाखाले पोखरामा कार्यशाला गरेको छ । सो अवसरमा चितवनमा हालै निर्वाचित कार्यसमितिलाई महासंघ कास्की शाखाले स्वागत तथा बधाई ज्ञापन गरेको छ ।

महासंघ केन्द्रीय उपाध्यक्ष ऋषिराम शर्मा भण्डारीले कास्की र चितवन शाखा उत्कृष्ट रहेको बताए । उनले कोरोना महामारीले पुस्तक व्यवसायी धरापमा परेको भन्दै व्यवसायीलाई हतोत्साहित नभई आफ्नो कर्म क्षेत्रमा अगाडि बढ्न सुझाव दिए ।

महासंघ कास्की अध्यक्ष मोहन सापकोटाले चितवन शाखासँग कास्कीको भावनात्मक सम्बन्ध रहेको बताउँदै नयाँ कार्यसमितिलाई सफल कार्यकालको शुभकामना दिए ।

महासंघ चितवनका नवनिर्वाचित अध्यक्ष उद्योगविक्रम बानियाँले कास्की शाखाले गरेको सम्मानबाट आफूहरु ऋणी रहेको बताए ।
महासंघ कास्की अध्यक्ष मोहन सापकोटाको अध्यक्षतामा भएको कार्यक्रमको सञ्चालन कास्कीका सचिव गोविन्द गौतमले गरेका थिए ।