पोखरा। ज्येष्ठ नागरिक सरोकार समाज नेपालको बुधबार आठौं साधारणसभा एवं ज्येष्ठ नागरिक सम्मान तथा पुरस्कार अर्पण समारोह भएको छ । कार्यक्रमको उद्घाटनपछि पोखरा महानगरपालिका ९ का अध्यक्ष रामराज लामिछानेले ज्येष्ठ नागरिक ज्ञान, सीप र अनुभवका सम्पति भएको बताए ।

‘वृद्धवृद्धाहरु पछिल्लो पुस्ताको लागि एक अमूल्य सम्पति हुन्’, उनले भने, ‘उनीहरुको अनुभव नै नयाँ पुस्तालाई अगाडि बढ्न काफी हुन्छ ।’ संस्थाले स्थापना कालदेखि नै ज्येष्ठ नागरिकहरुको हकहित र संरक्षणको क्षेत्रमा आएकोमा प्रशंसा गरे । संस्थाका लागि वडाबाट पनि सहयोग गर्ने उनको भनाइ छ । ज्येष्ठ नागरिक सरोकार समाजको विकासका लागि आगामी वर्षमा बजेट छुट्याउने उनले बताए ।

संस्थाको साधारणसभामा जेष्ठ जेष्ठ नागरिकहरु मुद्दामा आवाज उठाउँदै सहयोग गरेको भन्दै एभिन्यज टेलिभिजनका सुशील पाण्डेलाई पुरस्कार अर्पण गरिएको छ । उनलाई नगद १५ हजार रुपैयाँसहित प्रमाणपत्र र दोसल्लाले सम्मान गरिएको समाजका सचिव इच्छाबहादुर वाग्लेले बताए ।

बुधबार नै समाजले ७५ वर्षमाथिका ७ जना ज्येष्ठ नागरिकलाई सम्मान गरेको छ । सम्मानित हुनेहरुमा त्रिभुवन शर्मा, ईश्वरीप्रसाद सुवेदी, गोपिमान श्रेष्ठ, इन्द्रप्रसाद पौडेल, प्रेमराज अधिकारी, हर्कबहादुर गोदार र गणेशबहादुर कार्की छन् । सोही समारोहमा अक्षयकोष दाता हरिप्रसाद फुयाँल र भगवती फुयाँललाइ पनि सम्मान गरिएको छ । फुयाँल दम्पतीले आफ्ना बाबुआमाको स्मृतिमा ५१ हजारको अक्षयकोष स्थापना गरेका थिए ।

समाजले बुधबार वार्षिक मुखपत्र ज्येष्ठ नागरिक आवाज पनि विमोचन गरेको छ । संस्थाको आठौं साधारणसभाले सचिव इच्छाबहादुर वाग्लेको वार्षिक प्रगति प्रतिवेदन र कोषाध्यक्ष रामप्रसाद भण्डारीको आर्थिक प्रतिवेदन सर्वसम्मतले पारित गरेको छ ।