पोखरा । प्रमुख प्रतिपक्षी दल नेपाली कांग्रेस र अर्को प्रतिपक्षी जनता समाजवादी पार्टीले गण्डकी प्रदेशको विकास निर्माणका काम सुस्त भएको भन्दै प्रश्न गरेका छन् । आइतबार प्रदेशसभामा जरुरी सार्वजनिक महत्वको प्रस्ताव पेस गर्दै २ पार्टीले सरकार बजेट कार्यान्वयनमा असफल भएको दावी गरे ।
चालु वर्षका लागि सरकारले ३४ अर्ब ८४ करोडको बजेट सार्वजनिक गरेको छ । अघिल्लो वर्षको विनियोजित बजेटमध्ये ७ अर्बभन्दा बढी खर्च हुन सकेको थिएन । सरकारले कोरोनालाई देखाएर बजेट खर्च गर्नबाट पन्छिएको थियो । तर यो वर्ष पनि खर्च दर हालसम्म निकै न्यून छ । बजेटबाटै घोषणा गरिएको तालिका अनुसार काम नगर्दा बजेट कार्यान्वयन निराशाजनक देखिएको छ ।
सरकारले पहिलो चौमासिक भित्र सबै योजनाको कागजी प्रक्रिया पूरा गरेर काम थाल्ने बताएको थियो । अधिकांश योजनाको ६ महिना बितिसक्न लाग्दा समेत कागजी प्रक्रिया पूरा भएको छैन । कांग्रेस र जसपाले माघभित्र बजेट कार्यान्वयनका प्रारम्भिक प्रक्रिया पूरा नगरे बजेट नै सरेन्डर गर्न चेतावनी दिएको छ । जरुरी सार्वजनिक महत्वको प्रस्ताव पेस गर्दै कांग्रेस सांसद ललितकला गुरुङले कुनै पनि वहानामा बजेट कार्यान्वयनबाट सरकार पछि हट्न नपाउने बताइन् ।
‘केन्द्रीकृत शासन हुँदा अख्तियारी समयमा जाँदैनथ्यो । धेरै समय फाइल र प्रक्रियामा बित्ने समस्या थियो । कार्यान्वयनका लागि केहि महिना मात्रै बाँकी रहँदा बजेट फ्रिज हुने वा असारे विकासको नाममा आलोचित कार्यक्रमबाट बजेट खर्च गर्नुपर्ने बाध्यता थियो,’ उनले भनिन्, ‘अहिले त संविधानले नै बजेट कार्यान्वयनको मिति तोकिदिएको छ । तर समयमा खर्च किन हुन सकेन ?’ कोरोनालाई देखाएर बजेट कार्यान्वयन नहुनु तथ्यसंगत नभएको उनले बताइन् ।
‘प्रदेश सरकारले प्रश्तुत गरेको ३ वटा बजेट खर्च सन्तोषजनक देखिएको छैन । गत आवमा बजेट खर्च कम हुनुमा कोरोनालाई कारण बनाइए पनि यो अर्धसत्य छ,’ उनी भन्छिन्, ‘बास्केटमा रकम राखेर बजेट पास गराउने अनि संसदको काम मन्त्रीले गर्ने अराजकता यो वर्ष पनि रोकिएन ।
कयौं राम्रो योजनाहरु कार्यान्वयन नहुने र पटक पटक दोहोरिने प्रक्रिया यथावतै छ ।’ गुरुङले कार्यविधि आतंक मच्चाएर बजेट सही समयमा खर्च हुन नपाएको आरोप लगाइन् । ‘कार्यविधि बनाउन कति वर्ष लाग्ने हो ? एउटै मन्त्रालयको लागि मात्रै वर्षैपिच्छे कार्यविधि बनाइ राख्ने हो ?,’ उनी प्रश्न गर्छिन् । बजेट समयमै खर्च हुँदा अर्थतन्त्रलाई चलायमान बनाउने भन्दै उनले कम बजेट खर्च गरेर पछिल्ला वर्षमा बजेटको आकार बढाउने सोचाई गलत हुने तर्क गरिन् । अघिल्लो वर्षको ७ अर्ब रुपैयाँ खर्च हुन नसकेर अहिलेको बजेटमा मिसाइएको थियो ।
विभिन्न योजनाको सूची पेस गरेर गुरुङले काम नगर्ने र पटक पटक एउटै कार्यक्रम रातो किताबमा ल्याउने समस्या अव अन्त्य गर्नुपर्ने सुझाव दिइन् । खासगरी पोखरा चक्रपथ, बहुसांस्कृतिक ग्राम, गण्डकी काउ फार्म, फेवाताल संरक्षण, लामेआहाल तथा पृथ्वीचोक बसपार्क, १ स्थानीय तह १ उद्योग ग्राम, पोखरलाई अन्य प्रदेशको राजधानी र छिमेकी राष्ट्रको प्रमुख सहर सँगै हवाई मार्गबाट जोड्ने लगायत कार्यक्रम हरेक वर्षको बजेटमा उल्लेख भए पनि कामको प्रारम्भ नभएको प्रतिपक्षीले जनाएको छ ।
कोरोना प्रभावित कार्यक्रमका लागि सरकारले १८ करोड ५० लाख विनियोजन गरेको थियो । यो ठूलो आकारको बजेट भएको कार्यक्रम हो । ग्रामीण गरिवी निवारणको लागि दुग्ध विकास कार्यक्रमका लागि ११ करोड विनियोजन गरिएको छ । सार्वजनिक विद्युतिय सवारी प्रयोगमा प्रोत्साहन कार्यक्रमका लागि १० करोड छ । तर हालसम्म विद्युतीय सवारी खरिदका लागि सरकारले कुनै कार्यक्रम अघि सारेको छैन । प्रदेश विकास प्राधिकरणको लागि भवन निर्माण र सवारी खरिदको १० करोड छ । प्राधिकरण सम्बन्धी ऐन भर्खरै पास भएको छ । प्रांगारिक मल उत्पादन कारखाना स्थापनामा १ करोड छ । त्यसको कुनै टुंगो छैन । प्रोजेक्ट बैंक बनाउन विनियोजन गरिएको ५ करोड खोलिएकै छैन ।
प्रदेशस्तरीय सभाहल निर्माणमा १ करोड छुट्याइए पनि ठाउँ पहिचान समेत हुन सकेको छैन । प्रदेश स्तरमा केबलकार र मोनोरेलको सम्भाव्यता अध्ययनको निकै महत्वकांक्षी योजना सरकारको थियो । यसका लागि ४० लाख विनियोजन गरिएको छ । मध्यनेपाल, भीमाद, कुश्मा, फलेवास, पुतलीबजार, शुक्लागण्डकीलाई स्याटलाइट सिटी निर्माण गर्न विनियोजिट बजेट अलपत्र छ ।
पोखरा सभागृहको मर्मत गर्न २ करोड ५० लाख छुट्याइएको छ । त्यही अव्यवस्थित सभागृहमा प्रदेशसभा चलिरहेको छ । तर मर्मतमा कुनै चासो पुगेको छैन । निकै उत्साहका साथ अघि सारिएको भगत सर्वजीत सीप विकास कार्यक्रमको प्रक्रिया सुरु नै भएन । यसका लागि ८० लाख बजेट छ । विपक्षी पार्टीले कार्यक्रम र बजेट समेत खुलाएर कार्यान्वयनप्रति चासो देखाएको हो ।
कांग्रेस मेखलाल श्रेष्ठले सरकार निन्द्राबाट नउठेको तर्क गरे । ‘सरकारलाई धेरै पटक सुझाव दियौं । कार्यक्रममा समर्थन गर्यौं । रचनात्मक सहयोग गर्यौं। सरकार अझै चिर निन्द्रामा रह्यो,’ उनले भने, ‘सरकारलाई सुन्ने आवाजमा भन्नका लागि प्रस्ताव ल्याएका छौं । सरकारलाई घोचोस् र ब्युँझियोस् । समयमा कार्यान्वयन होस् ।’ अर्की समर्थक धनमाया लामा पोखरेल सरकारसँग बजेट खर्च गर्न सक्ने क्षमताको अभाव रहेको बताइन् । ‘प्रदेश गौरवका आयोजना सन्तोषजनक छैन । उज्यालो प्रदेश, १ घर १ धारा, १ निर्वाचन क्षेत्र–१ सडकको कार्यान्वयन पनि उस्तै छ,’ उनले भनिन्, ‘सरकारले काम गर्न सकेन । अव सरकारले अर्ध वार्षिक प्रगति विवरण संसदमा पेस गरोस् ।’
सत्तापक्षीय सांसद दीपक कोइरालाले सरकारकै उदासिनताका कारण बजेट खर्च हुन नसकेको आरोप लगाए । ‘बजेट निर्माण र कार्यान्वयनको ट्रेन्ड चेन्ज हुनै सकेको छैन । नीति कार्यक्रम अनुसार बजेट बन्दैन भने कार्यान्वयन कसरी हुन्छ ?,’ उनले भने, ‘मन्त्रीहरुलाई उद्घाटन र शिलान्यासमा व्यस्त हुनुपर्ने र कर्मचारीहरु पन्चायती शैलिबाट कागज पल्टाउने मात्रै गरेर खर्च भएन । टर्च लाइट बालेर बाटो पिच भएका छन् । नियम मात्रै राम्रो भएर नहुने रहेछ । नियत राम्रो भएको शासक चाहिने रहेछ । अहिले त्यो पाइएन ।’
नेकपाका प्रमुख सचेतक मायानाथ अधिकारी सरकारले बजेट कार्यान्वयनका लागि सबै प्रारम्भिक तयारी पूरा गरिसकेको दाबी गर्छन् । ‘हिजोका दिनमा जिल्लागत कार्यालय थिएनन् । कर्मचारी नभएका, बाहिरी जिल्लामा गएर काम गर्दा अप्ठेरो भएको थियो । संघीयतामा जनताले झनै दुख पाउने अवस्था आएको थियो,’ उनी भन्छन्, ‘तर अहिले अधिकांश कार्यालय जिल्लामा खुलेका छन् । काम सम्हालिसकेका छन् । सरकारलाई धन्यवाद छ ।’ पहिलो चौमासिकमै उल्लेखनीय बजेट खर्च भएको भन्दै उनले जनताको तीब्र विकासको चाहना यही सरकारले पूरा गर्ने बताए ।
सांसद आशा कोइरालाले कमजोरीसहित काम सन्तोषजनक रहेको बताइन् । ‘नयाँ अभ्यास भएकोले कमजोरी छन् । विशिष्ट कार्यक्रम समानुपातिक नै छ । सहज ढंगले बजेट कार्यान्वयन भए सरकार उदाहरणीय बन्छ,’ उनले भनिन्, ‘तर विकास निर्माणमा उत्साहजनक रुपमा हिडिरहँदा राष्ट्रिय राजनीति अवस्था जटिल बनेको छ । हामीलाई अत्यन्तै पीडाबोध भइरहेको छ ।’
सांसद मीनप्रसाद गुरुङले जरुरी सार्वजनिक महत्वको प्रस्तावले सकारात्मक सन्देश दिएको बताए । राष्ट्रिय जनमोर्चाका सांसद खीमविक्रम शाहीले योजना बेलैमा सुरु गर्ने र बेलैमा सक्ने भनेर सरकारले बाचा गरेपनि काम हुन नसकेको गुनासो गरे । विन्दुकुमार थापाले सरकारले बजेटका बेला धेरैलाई मिठो सपना देखाउने, बजेटमा ल्याउने तर कार्यान्वयन नहुने पूरानो रोग भएकोले संघीयतामाथि खतरा बढेको बताए ।
अर्का सांसद धनन्जय दवाडी सुरुआती चरणमा भएकोले कार्यान्वयन सन्तोषजनक रहेको बताए । ‘३ वर्षको बालकलाई ३० किलोको भारी बोकाएर ३ सय किलोमिटर दौडिन लगाउँदा राम्रो नतिजा आउँदैन,’ उनले भने, ‘विधेयक बनेको छ । धेरै योजना कार्यान्वयनमा छन् । गर्व गरौं । गरेका काममा खुसी बनौं ।’
सांसद चन्द्रबहादुर बुढा सरकारले सुझाव ग्रहण नगरेको बताउँछन् । यद्यपि समग्रतामा यो वर्ष बजेट कार्यान्वयन सही ठाउँमा रहेको उनको भनाइ छ । सांसद राजीव पहारीले सरकारको काम निकै प्रशंसनीय भएको दाबी गरे । सरिता गुरुङले काम नगरेर सरकार पक्ष सांसदहरुले तथ्यांक नै तोडमोड गरेको आरोप लगाइन् । उनले सरकारले जनतामाथि ढाँटेको बताइन् ।
सांसदहरुले उठाएका प्रश्नमाथि जवाफ दिँदै भौतिक पूर्वाधार विकास मन्त्री रामशरण बस्नेतले चालु वर्षमा लक्ष्य अनुसार नै बजेट खर्च हुने दाबी गरे । उनका अनुसार १२ प्रतिशतभन्दा बढी खर्च पहिलो चौमासिकसम्म भइसकेको छ ।
अधिकांश योजना कार्यान्वयनको चरणमा गसकेकोले बजेट खर्च कम देखिएपनि प्रगति बढिसकेको उनको दाबी छ । ‘पूर्व तयारीका काम सम्पन्न भएका छन् । कागजी प्रक्रियाका कारण खर्च कम देखिएको हो । तर यो वर्ष लक्ष्य अनुसार खर्च हुने छ,’ उनले भने, ‘बजेट कार्यान्वयनमा कुनै शंका नगर्नुहोला । इमान्दारीताका साथ सरकारले काम गर्छ ।’
बस्नेतले केही योजनाहरु कार्यान्वयनमै लैजान नसक्ने खालका समेत भएकोले त्यसको निक्र्यौल गरिरहेको बताए । ‘सरकारले सपना मात्रै बाँडेको छैन । व्यवहारमै देखिएको छ,’ उनी भन्छन्, ‘हामीले थुप्रै प्रयत्न गरेका छौं । जिल्ला जिल्लामा कार्यालय खोलिरहेका छौं । अव कार्यान्वयनको दर दु्रत गतिमा बढ्छ ।’ मन्त्री बस्नेतले योजना र बजेट खर्चको फेहरिस्त नै पेस गरेका थिए ।
Related News
सम्बन्धित समाचार
कतारी अमिर स्वेदश फिर्ता : पोखरा–कतार उडान माग
कास्कीमा एसइई उत्तरपुस्तिका परीक्षण रोकियो
गण्डकीमा डायलाइसिसका लागि अब पालो कुर्न नपर्ने
स्वदेश फर्किए कतारी अमिर
कतारका अमिरको भ्रमणसम्बन्धी खबर प्राथमिकतामा, विपिनको रिहाइ ‘मुख्य विषय’
hero news full width
मुख्य समाचार
रोजगार खोज्दै मेलामा
कतारी अमिरलाई ‘रुद्रकली’ र ‘खगेन्द्रप्रसाद’ !
वैशाख ११, २०८१फेवातालमा दुर्घटनामा परेका ५ जनाको उद्धार
वैशाख ११, २०८१लोकतन्त्रका १८ वर्ष : लोकतन्त्रले छोएन लोकलाई
वैशाख ११, २०८१कामचलाउ सरकारको आयु लम्बियो
वैशाख ११, २०८१गण्डकी सरकारविरुद्दको मुद्दा हेर्दाहेर्दैमा, आज टुंगो लागेन
वैशाख १०, २०८१