Worldlink ads

कामकै आधारमा इतिहास बनाउँछु : विन्दु कोइराला सुवेदी

prakash dhakal प्रकाश ढकाल
पौष २४, २०७७
Bindu Koirala Subedi

२०६३ सालको निर्वाचनमा पोखरा उद्योग वाणिज्य संघमा कार्यसमिति सदस्य बनेकी विन्दु कोइराला त्यसपछिका सबैजसो कार्यकालमा संघभित्रै रहेर काम गरिन् । २०७१ सालमा उनी कार्यसमिति सदस्यमा मनोनित हुँदै महिला उद्यम विकास समितिको संयोजक बनिन् भने २०७३ को निर्वाचनमा वाणिज्य उपाध्यक्ष बनेकी थिइन् । २०७५ सालको ३२ औं महाधिवेशनबाट विन्दु उद्योग उपाध्यक्षमा निर्वाचित भइन् । अहिलेसम्म उनी त्यही पदमा कार्यरत छन् । संघको ३३ औं महाधिवेशनमा अध्यक्ष पदमा उम्मेदवारी दिएकी बिन्दु कोइराला सुवेदीसँगको अन्तर्वार्ता :

यति लामो समय टीममा रहेर काम गर्नुभयो । के गर्न सक्नु भएन र अध्यक्ष नै बन्नुपर्‍यो ?
आआफ्नो पदीय दायित्व हुन्छ । त्यो पूरा गरेको छु । अध्यक्ष प्रणाली नै छ । कहिलेकाहिँ अध्यक्ष एउटा आउने र टीम अर्को आउने । म स्वतन्त्र रुपमा लडेर आएपछि राम्रा विचार ल्याउँदा पनि सहयोग नपाउने भयो । महिला नै भएको कारणले पनि दुख कष्ट भयो । अहिले महिलालाई नै सहयोग गर्नुपर्छ भनेर हस्तीहरुले साथ दिनुभएको छ । त्यसैले म ढुक्क छु । भूमिका कुशलतापूर्वक पूरा गर्छु भन्ने विश्वास छ ।

उद्योग वाणिज्य संघको भित्र र बाहिरका समस्या के हुन् ?
गुट उपगुट छ । धेरै कुरा चिरिएको छ । अबबाट त्यो समस्या हुँदैन भन्ने विश्वास छ । मैले नै चालेको कदमबाट गुट उपगुट अन्त्य हुनेछ । बाहिरका धेरै समस्या छन् । उद्योगी व्यवसायी थला परेका छन् । सरकारसँग दबाब सिर्जना गर्न सकिएको छैन । अध्यक्षले मात्रै गर्दा आवाज बुलन्द हुन सकेन । मेरो साथमा ग्रुप छ । ग्रुपबाट नै आवाज बुलन्द गर्छौं । हर तह तप्कामा एउटै मुख लिएर जान्छौं । त्यो साझा एजेन्डा हुन्छ ।

महिलाहरु पहिलेदेखि नै क्याम्प फेरेर नेतृत्वमा दाबी गर्ने चलन छ । तपाईं पनि असन्तुष्ट समूहको नेतृत्व गर्नुभयो भन्ने आरोप छ नि !
मलाई राजनीति मनै पर्दैन । अघिल्ला दिनहरुमा पनि स्वतन्त्र बनेर चुनाव लडेको उदाहरण छ । त्यहिँ बसिरहनुपर्छ भन्ने आवश्यकता पनि होइन । म एक्लै पनि चुनावमा होमिन्छु भनेर लागेको थिएँ । उद्योगी व्यवसायीहरु मेरो साथमा हुनुहुन्छ भन्ने विश्वास थियो । अहिले हस्तीहरुको साथ पाउँदा छ अझै हौसला मिलेको छ । मलाई क्याम्पभित्रको भन्दा पनि कसैसँग डग्दिन र आँटिली छ भनेर भोट दिनुहोला । कुनै क्याम्पको सहयोग होइन, उद्योगी र व्यवसायीको सहयोग चाहिएको छ । उद्योग वाणिज्य संघलाई साझा बनाउन प्रयास गर्छु ।

अर्को समूहले पनि त्यही भनेर भोट मागिरहेको छ । साझा बनाउने कुरा अमुर्त भयो, मुर्त एजेन्डा भन्दिनु न ।
उद्योगी व्यवसायीहरु निराश हुनुहुन्छ । सरकारले मौद्रिक नीति मार्फत व्यवसाय उत्थान कोष खडा गरेर पनि हाम्रो लबिङ नपुगेर कार्यान्वयन भएन । त्यो ल्याउन पहल गर्छु । कार्यान्वयन गराएरै छाड्छु । पोखरा उद्योग वाणिज्य संघ घाटामा चलिरहेको छ । यसलाई सबलीकरण गर्न पार्टनर अर्गनाइजेसन खोजिरहेको छु । महिलाहरुका छुट्टै एजेन्डा छन् । मलाई अध्यक्ष बनायो भने महिलाका लागि रिफर्म गर्नुपर्छ । हरेक घरमा महिला छन्, सबैको समृद्धि आओस् । महिलाका पक्षमा काम गर्दा पुरुषहरु पनि खुसी हुनुहुन्छ । सरकारी निकायसँग लबिङ गर्ने जोड हुन्छ । लबिङ नपुगेका कारण छबी घट्दै गएकोछ । छबी उकास्नका लागि सरकारी निकायसँग आवाज राख्ने छु । सरकारी निकायसँग समन्वय गर्ने कुरामा र खवरदारी गर्नेछु ।

विन्दु कोइराला सुवेदीले चुनाव जित्ने हो कि सबैले जित्नुहुन्छ ?
टिमका सबैले चुनाव जित्नुहुन्छ । मलाई सफल पार्न मेरा साथीहरुलाई पनि जिताउनु हुनेछ भन्ने विश्वास छ । त्यसका लागि आग्रह समेत गर्दछु । उहाँहरु आफै सफल हुनुहुन्छ । उद्योग वाणिज्य संघ एउटा उचाइमा पुग्नेछ । एकएक गरेर हेर्नुस्, सबै योग्य उम्मेदवार हुनुहुन्छ ।

अरु योग्य मान्छे नभेटेर हो कि किन उम्मेदवार खाली छोड्नुभएको ?
होइन, कति साथीहरु उता पनि राम्रो र योग्य हुनुहुन्छ । हामी भनेको एउटा स्वतन्त्र हो । स्वतन्त्रले प्यानल पूरै उठाउने हो भने त सिन्डिकेट भइहाल्यो नि । अरु नयाँ मान्छे अटाउन पाएनन् । उद्योगी व्यवसायीलाई पनि सहज होस् मतदान गर्न । कति साथीहरुलाई त सर्वसम्मत पनि बनाइसकेका छौं । कठोर भएर लोभलालच वा हामी मात्रै सर्बेसर्बा हौं भनेको छैन ।

जित्ने आत्मविश्वास कत्तिको छ ?
पूर्णरुपमा आत्मविश्वास बढेर आएको छ । किनभने अघिल्ला वर्षहरुमा सोचेजति गर्न सकिएन । अहिले मेरो साथमा हिड्नुभएका साथीहरु हस्तीहरु हुनुहुन्छ । साना कुराहरुमा खिचातानी गर्ने हुनुहुन्न । वहाँहरु समय दिएर उद्योग वाणिज्य संघमा आउनुभएको छ । म पनि वास्तविक उद्योगी व्यवसायीको साथमा छु । म आफैसँग पनि लोभ लालच छैन । कार्यव्यस्तता छैन । समय निकाल्न सक्छु । मेरो टिमको साथले चुनाव जित्ने विश्वास छ ।
लामो समयसम्म संघमा लागें । चाहेर पनि कत्ति कुरा गर्न सकिएन । आँफै नेतृत्वमा पुग्दा त काम गर्न कसैले रोक्ने कुरा हुँदैन । ऐतिहासिक कार्यकाल बनाउछु भन्ने सपना बोकेर हिडेकी छु । हरबखत उद्योगी व्यवसायीको हितका लागि काम गर्नेछु । केहि परिवर्तन देखाएरै छाड्ने छु ।

इतिहास रच्ने कुरा गर्नुभयो । महिला भएर इतिहास रच्ने कि काम गरेर इतिहास रच्ने ?
होइन, म पुरुषभन्दा माथि उठेर काम गरेर देखाउँछु । म फिमेल हो तर काममा पुरुषभन्दा कमी हुँदैन । शिक्षा पनि कम छैन । अनुभव पनि धेरै छ । समूह राम्रो छ । खासगरी मेरो आत्मबल बढेको छ । माकुराको जालोबाट उम्केर आएको छु, त्यसले मलाई बलियो बनाएको छ । पूर्णरुपमा संघलाई समय दिएर काम गर्छु । पहिलो महिला भनेर होइन, कामकै आधारमा सफलताको इतिहास बनाउने छु ।

जीतका लागि शुभकामना छ । तर हार्नका लागि चाहिँ तयार हुनुहुन्छ कि हुनुहुन्न ?
त्यस्तो त सोचेको छैन । तर प्रजातान्त्रिक अभ्यास हो । यो अभ्यासमा सबै नतिजा स्वीकार्नुपर्छ । बाँकी उद्योगी व्यवसायीको हातमा जिम्मा दिन्छु ।

यदि हार्नुभयो भने ? संघसँगको सम्बन्ध कसरी कायम राख्नुहुन्छ ?
म साधारण सदस्य रहन्छु । १४ वर्षसम्म निरन्तर काम गरेको छु । १२ वर्ष निरन्तर काम गर्नेलाई मानार्थ सदस्य दिने विधान छ । त्यसका लागि मेरो योग्यता पुगिसकेको छ । हर बखत संघलाई मन्दिर मानेर पुजा गर्नेछु । कहिले कोही आउँछ । केही समयपछि उ जान्छ । तर मन्दिर त रहिरहन्छ । त्यसको भक्त भएर काम गरिरहने छु ।

अन्तमा केहि भन्नु छ ?
उद्योगी व्यवसायीले विवेक पुर्‍याउनुहुन्छ । उहाँसँग विवेक प्रयोग गर्ने हैसियत छ । त्यसैले सबै जिम्मा उहाँहरुलाई नै दिन्छु ।

Related News

सम्बन्धित समाचार

    hero news full width

    sanil ads

    wordlink ads