लेखनाथ । गण्डकी प्रदेशअन्तर्गतको प्रदेश संक्रामक रोग तथा सरुवा रोग अस्पतालको निर्देशकमा डा. विकास गौचन नियुक्त भएका छन् । खुला प्रतिस्पर्धाबाट नियुक्त भएका उनी यसअघि हेल्थ नेपालले सञ्चालन गर्दै आएको अछामको बयलपाटा सामुदायिक अस्पतालमा निर्देशकका रुपमा कार्यरत थिए ।

लेखनाथमा लायन्सले सञ्चालन गरेको सामुदायिक अस्पताल प्रदेश सरकार मातहत आएपछि कार्यकारी निर्देशकका लागि दरखास्त आह्वान गरिएको थियो । सरकारले चालु आर्थिक वर्षमा ७ वटै प्रदेशमा ५० शड्ढयाको सरुवा रोग अस्पताल स्थापना गर्ने घोषणा गरेको थियो । सोहि घोषणाअन्तर्गत गण्डकी प्रदेश सरकारले कार्यकारी निर्देशकको लागि खुल्ला प्रतिस्पर्धाबाट उम्मेदवार आह्वान गरेको हो ।

डा. गौचनले बिहीबार नै पदभार ग्रहण गरेका छन् । अस्पतालका मेडिकल सुपरिन्टेन्डेन्ट डा. त्रिभुवन पौडेलले अस्पतालको सम्पूर्ण जिम्मेवारी सम्हाल्दै आएका थिए । डा. गौचनले आफ्नो सीप, क्षमता र दक्षताले भ्याएसम्म काम गर्ने प्रतिबद्धता जनाए ।

मुस्ताङमा जन्मेका डा. गौचनले आफ्नै क्षेत्रमा सेवा गर्ने अवसर प्राप्त भएको कुरा सुनाउँदै आगामी दिनमा अल्पकालीन, मध्यकालीन र दीर्घकालीन योजना बनाएर अगाडि बढ्ने बताए । अस्पतालबाट प्रदान हुने सेवालाई प्रभावकारी बनाउँदै अन्तर्राष्ट्रिय स्तरको सेवा दिनसक्ने गरी काम गर्ने उनले बताएका छन् ।

कार्यक्रममा पोखरा महानगरपालिका वडा नम्बर ३० का वडाअध्यक्ष श्रीराम पोखरेलले अस्पतालको सेवा सुधारका लागि सहयोग गर्न सदा तत्पर रहेको बताए । अस्पताल सञ्चालक समिति सस्थापक अध्यक्ष डा. कालु शर्माले अस्पतालको विकासका लागि आर्थिकदेखि प्राविधिक सहयोग गर्न आफू तयार रहेको बताए ।

कार्यक्रममा लेखनाथ सामुदायिक लायन्स अस्पताल सञ्चालक समिति अध्यक्ष रमानाथ पौडेल, निवर्तमान अध्यक्ष मेजर रामप्रसाद गुरुङ र अस्पतालका कार्यालय प्रमुख केदार लामिछानेले अस्पताका गतिविधि र भौतिक अवस्थाका बारेमा जानकारी गराएका थिए ।