पोखरा । पोखरा महानगरपालिकाका उपप्रमुख मञ्जुृदेवी गुरुङले महानगरको विकासमा सरकार र नागरिकबीच सहकार्य आवश्यक रहेको बताएकी छन् ।

पोखरा – १४ मोहन मार्गस्थित भूपू सैनिक सक्रिय टोलमा निर्मित फुट ट्रयाक उद्घाटनपछि मंगलबार उनले भूपू सैनिकहरु आफ्नो इमान्दारिता र बहादुरी प्रर्दशन गरेर विश्वमा चिनाएको भन्दै टोललाई नमुना बनाउन समेत भूमिका खेलेको बताइन् ।

वडा सदस्य जीतेन्द्रजंग थापाले भूपू सक्रिय टोल पोखरा १४ को नमुना टोल बनेको बताए । भूपू सक्रिय टोलका कोषाध्यक्ष क्याप्टेन गोलमान गुरुङले आफ्नो पेन्सनको रकमबाट फुट ट्रयाक, फुटट्रयाकमा रेलिङ, स्टेन्डसहित फूलको गमला र टोललाई सुरक्षित बनाउन ६ वटा सिसि क्यामेरा जडान गरेको जानकारी गराए । उनले यसका लागि १२ लाख ८० हजार रुपैयाँ खर्च भएको बताए ।

टोलका उपाध्यक्ष दलबहादुर गुरुङले आफ्नो टोल आफै बनाँऔ भन्ने उद्देश्यले काम गरेको बताए । उनका अनुसार डम्बरकुमारी गुरुङले आफ्नो व्यक्तिगत २ लाख ५० हजार खर्च गरेर चौतारी निर्माण गरेकी छन् । भूपू सैनिक सक्रिय टोलका अध्यक्ष बलबहादुर गुरुङको अध्यक्षतामा भएको कार्यक्रममा सचिव टुकबहादुर गुरुङले सञ्चालन गरेका थिए ।