दमौली । दमौली अस्पतालले बिरामीलाई गुणस्तरीय सेवा दिन पछिल्लो समय नयाँ–नयाँ उपकरण थप गरेको छ । लकडाउनअघि सम्म आफैमा ‘बिरामी अस्पताल’ को परिचय बनाएको जिल्ला अस्पतालले पछिल्लो समय सेवा थप्दै क्रमिक सुधार थालेको हो ।

अस्पतालमा हालै थाइराइड परिक्षण गर्ने मेसिन थपिएको छ । गण्डकी प्रदेश सरकारले मेसिन उपलब्ध गराएपछि अस्पतालले थाइराइड परीक्षण तयारी गरेको अस्पताल विकास समिति अध्यक्ष प्रदीपराज अधिकारीले जानकारी दिए ।

प्रदेश सरकारले उपलब्ध गराएको मेसिनलाई १० लाख रुपैयाँ परेको छ । ‘अस्पतालमा सेवा थप गर्ने योजनाबमोजिम थाइराइड परीक्षण गर्ने उपकरण आएको हो । केही दिनमा परीक्षण सुरु हुन्छ’, उनले भने । अब थाइराइडका बिरामीले चर्को शुल्क तिरेर निजी स्वास्थ्य संस्थामा परीक्षण गराउनुपर्ने बाध्यता अन्त्य हुने उनको भनाइ छ ।

अस्पतालका मेडिकल सुपरीटेन्डेन्ट डा सुनिल पौडेल थाइराइड विशेषज्ञ हुन् । उपकरण सञ्चालनका लागि ल्याब प्राविधिकलाई तालिम दिइने उनले बताए । ‘उपकरण जडान गर्ने बेलामा तालिम दिएपछि लगत्तै सेवा दिन थाल्छौँ’, अधिकारीले भने ।

यस्तै, अस्पतालमा एक साताअघि मात्रै ४ थान भेन्टिलेटर ल्याइएको थियो । त्यस्तै, दन्त सेवा दिन डिजिटल एक्सरे मेसिन संचालनमा ल्याइएको थियो । ‘डिजिटल एक्सरे मेसिनले उपचारमा सहज बनाएको छ’, दन्तसेवा इञ्चार्ज डा अपिल बस्नेतले भने, ‘पहिला बिरामीलाई सेवा दिदाँ पुरानो मेसिनका कारण ढिलो हुन्थ्यो । नयाँ मेसिन राखेपछि कसैले पनि पालो पर्खनुपर्दैन ।’ दैनिक १ सय ५० जनासम्म बिरामीले सेवा लिने गरेको उनले बताए । छिमेकी जिल्ला गोरखा, लमजुङ र कास्कीका विभिन्न स्थानका बिरामी दमौली अस्पताल आउने गरेका छन् ।

लकडाउनपछि अस्पतालमा नयाँ मेसिन जडान र स्तरोन्नतिमा ४ करोड रुपैयाँ बराबर खर्च भएको अस्पताल विकास समिति अध्यक्ष प्रदीपराज अधिकारीले बताए ।

२०५९ सालमा अस्पतालको रुपमा स्तरोन्नति दमौली अस्पताल उपकरण थप्ने अभियानमा जुटेको छ । गत महिनामात्रै एनेस्थेसिया मेसिन जडान गरियो । बिनाअक्सिजन शल्यक्रिया गर्न सकिने २० लाख रुपैयाँ बराबरको उक्त मेसिन स्वास्थ्य तथा जनससंख्या मन्त्रालयले उपलब्ध गराएको थियो । १५ शैय्या क्षमताको प्रादेशिक ‘क’ वर्गको अस्पतालले आँखा, दाँत, डायलाइसिस, भिडियो एक्सरे, एक्सरे, प्रसूति , ओपिडी, मानसिक, एचआइभी संक्रमितका लागि एआरटी, क्षयरोग, प्रयोगशाला, स्वास्थ्य बीमा, गर्भवती, खोप, औषधालय लगायत सेवा प्रदान गर्दै आएको छ ।

पन्ध्र शैय्याको अस्पताललाई ५० शैय्यामा स्तरोन्नति गर्ने तयारी छ । त्यसका लागि जग्गा अभावले समस्या उत्पन्न गराएको छ । प्रदेश सरकारमातहत दुई सरकारी कार्यालयको जग्गा उपलब्ध गराइदिन मुख्यमन्त्रीसँग अस्पताल प्रशासनले अनुरोध गरेको छ । कृषि ज्ञान केन्द्रको स्वामित्वको जग्गामध्येबाट ५ रोपनी र भेटेरीनरी अस्पताल तथा पशु सेवा विज्ञ केन्द्रको स्वामित्वको ८ रोपनी जग्गा अस्पताललाई उपलब्ध गराउन माग गरिएको हो । अस्पतालको हाल साढे १५ रोपनी जग्गा छ । ५० शैय्याको अस्पताल बनाउन कम्तीमा ३५ रोपनी आवश्यक पर्ने अध्यक्ष अधिकारीले बताए ।