पोखरा । नागरिक समाज पोखराले पोखराका महत्वपूर्ण सम्पदा ४० वर्षका लागि ठेक्का दिने पोखरा महानगरपालिकाको निर्णय गलत भएको भन्दै तत्काल निर्णय सच्याउन माग गरेको छ ।

संस्थाको बुधबार बसेको बैठकले महानगरले विधि र प्रक्रिया मिचेर पोखराका महत्वपूर्ण सम्पदा ठेक्कामा दिने निर्णय गलत भएकोले तत्कालन सच्याउन माग गरेको हो ।
यस्तै, सरकारले मंगलबार जारी गरेको अध्यादेशले राजनीतिक द्वन्द सृजना भई मुलुकलाई अस्थिरतातर्फ लैजाने सम्भावना रहेकोले अविलम्ब फिर्ता लिन पनि माग गरेको छ ।

यसैगरी, पोखरा महानगरले छुट्टै पार्किङ क्षेत्र व्यवस्था नगरी सार्वजनिक सडक, सडकपेटी र सडक किनारका खाली ठाउँ पार्किङस्थलमा परिणत गरेर शुल्क उठाउने गलत काम गरेको भन्दै सो कार्य रोक्न माग गरेको छ ।

साथै सडक किनारमा सवारीसाधन पार्किङ गर्ने गैह्रकानुनी गतिविधि अन्त्य गर्न महानगरका मेयरसमक्ष गम्भीर ध्यानाकर्षण गराउने प्रस्ताव पारित गरेको संस्थाका पूर्व अध्यक्ष रामबहादुर पौडेलले जानकारी दिए ।

सेती नदी खोंच, पाताले छाँगो, सराङ्कोटको डाँडा, होर्डिङ बोर्ड, फेवा र बेगनास तालमा वाटर स्पोर्टस् आयोजना सञ्चालनका लागि सार्वजनिक निजी साझेदारी (पिपिपी) कार्यक्रम अन्तर्गत महानगरले निजी क्षेत्रलाई गुहारेको हो ।

महानगरको सार्वजनिक निजी साझेदारी नियमावलीले बढीमा ४० वर्षसम्म ठेक्का दिन मिल्ने व्यवस्था गरे पनि संघ सरकारका कानुनले बढीमा ३५ वर्षको सीमा तोकेको छ । केही आयोजनाको प्रक्रिया अघि बढिसकेको छ भने केही थाँती रहेको महानगरका पिपिपी कार्यक्रमका फोकलपर्सन महेन्द्रबहादुर गोदारले जानकारी दिए ।