पोखरा । पोखरा महानगरपालिका १० मा आबद्ध महिला स्वयंसेवीलाई सहरी स्वास्थ्य सेवा केन्द्र पोखरा १० ले बुधबार सम्मान गरेको छ । १७ औं राष्ट्रिय स्वयसेवीका दिवस २०७७ का अवसरमा उनीहरुलाई सम्मान गरिएको हो ।

वडा सदस्य एवं सहरी स्वास्थ्य सेवा केन्द्रका उपाध्यक्ष सम्मरबहादुर श्रेष्ठले वडामा स्वास्थ्य सेवा केन्द्र स्थापना र सञ्चालन गरी अति विपन्न परिवारका सदस्य लगायत अन्य बिरामीलाई निशुल्क सेवा दिँदै आइरहेको भन्दै स्वयंसेवीको प्रशंसा गरे । जनसेवामा खटिएका १४ जना स्वयंसेवीलाई उक्त अवसरमा सम्मान गरिएको छ । १४ जनामध्ये १ जनालाई उत्कृष्ट छनोट गरी विशेष सम्मान गरिएको छ ।

वडाध्यक्ष राजकुमार गुरुङको अध्यक्षतामा भएको कार्यक्रममा माया गुरुङ भुजेल लाई उत्कृष्ट घोषणा गरी मायाको चिनो, सम्मान पत्रले सम्मान गरिएको छ । कार्यक्रममा पोखरा महानगर पालिका स्वास्थ्य महाशाखाका अस्पताल निरीक्षक सविना श्रेष्ठ, वडा सदस्यमा निशा मल्ल ठकुरी, प्रतिभा विक पोखरेल, दीपकबहादुर थापा, वडा सचिव हरिकृष्ण आचार्य लगायतले भनाइ राखे राखे ।

यसैगरी सम्मानित माया गुरुङ भुजेल, महिला स्वयं सेविका वडा नं १० का संयोजक गीता कोइराला र नेपाल रेडक्रस सोसाइटी पोखरा १० वडास्तरीय विपत व्यवस्थापन समिति संयोजक टुकाराम लामिछाने लगायतले सहरी स्वास्थ्य सेवा केन्द्रको अवस्थाका बारेमा भनाइ राखे ।