पोखरा। नेपाली कांग्रेस केन्द्रीय सदस्य अर्जुननरसिंह केसीले यथास्थितिमा कांग्रेस सरकारमा जानु राजनीतिक आत्महत्या हुने टिप्पणी गरेका छन् । पाँच वर्षका लागि प्रतिपक्षमा बस्ने जनमत पाएकोले हतारिएर सत्ता सञ्चालनमा लाग्नु पार्टी र जनताका लागि पनि अहित हुने उनको भनाइ छ ।

‘ओली सरकारको फोहोर सफा गर्न सरकारमा जानु भनेको आत्महत्यासरह हो तर नेकपा फुटिहाल्यो भने सरकारलाई शून्यता बनाउने पक्षमा कांग्रेस छैन,’ नेपाल प्रेस युनियन कास्कीले बुधबार आयोजना गरेको पत्रकार सम्मेलनमा उनले भने, ‘सरकारमा नगई जुन पक्षलाई सहयोग गर्दा लोकतन्त्र बलियो हुन्छ, त्यसैलाई समर्थन गर्छ । तर, सरकार बाहिर रहन्छ ।’

उनले कांग्रेस महाधिवेशनभन्दा सरकारले गरेका ज्यादतिविरुद्ध आन्दोलन तयारीमा लाग्नुपर्ने बेला आएको बताए । ‘कांग्रेस यतिबेला महाधिवेशन तयारीमा छ । यो बेला यता केन्द्रित हुने अवस्था रहेन,’ उनी भन्छन्, ‘सरकारले लोकतान्त्रिक मूल्यमान्यता सबै ध्वस्त पा¥यो । त्यसविरुद्ध लड्न महाधिवेशनभन्दा पनि आन्दोलनकेन्द्रित हुन मेरो प्रस्ताव छ ।’ उनले अन्तरिम नेतृत्व चयन गरेर महाधिवेशन डेढ वर्ष पछि धकेल्न सुझाए ।

उनले संवैधानिक परिषद्सम्बन्धी अध्यादेश लोकतन्त्रमाथिकै चुनौती भएको तर्क गरे । उनले प्रधानमन्त्री केपी शर्मा ओली न्यायपालिका, कार्यपालिका र व्यवस्थापिकालाई राज्यसत्तामा केन्द्रित गरी अधिनायकवादउन्मुख भएको बताए । युनियन कास्की अध्यक्ष नवीन सिग्देलको अध्यक्षतामा भएको कार्यक्रममा उपाध्यक्ष प्रकाशचन्द्र सापकोटाले स्वागत र सचिव प्रदीप पौडेलले संचालन गरेका थिए ।