पोखरा । पोखराको पर्यटन व्यवसाय बिस्तारै तङ्ग्रिने तरखरमा छ । कोरोना महामारीले झण्डै १० महिनासम्म थिलोथिलो बनेको यो व्यवसाय आन्तरिक पर्यटककै भरमा पनि जुर्मुराउने प्रयासमा रहेको हो । सरकारले लकडाउन, निषेधाज्ञा हटाउँदै आफ्नो कार्यविधि पनि खुकुलो बनाउन थालेकोले विदेशीको अभावमा पनि आन्तरिक पर्यटक घुम्न आउने गरेका छन् ।
रेष्टुरेन्ट एण्ड बार एशोसिएसन (रेवान) पोखराका अध्यक्ष लक्ष्मण बराल आंशिकरुपमा रेष्टुरेन्ट तथा बार चलाए पनि आफूहरु निकै आशावादी रहेको सुनाउँछन् । ‘अचेल अल्लि राम्रो भइरहेको छ । पहिलाको जस्तो छैन । सीमित स्रोत साधन र जनशक्ति राखेर चलाइएको छ । संचालन खर्च उठिरहेको छ । लकडाउनको बेलामा भन्दा धेरै एक्टिभ भएका छौं, ’ बराल भन्छन्, ‘विदेशी पर्यटक नआइकिन त पूरै धान्न गाह्रो हुन्छ । तैपनि विदेशमा खोप बन्दै गरेको समाचार र अहिलेको अवस्थाले आशावादी बनेका छौं ।’
उनका अनुसार व्यवसायका लागि करिब ७० प्रतिशत जति कर्मचारी काममा छन् । ‘घर गएकाहरुलाई पनि आलोपालो प्रणालीमा राखेर बोलाउने गरेका छौं । कर्मचारी पनि नमर्ने र व्यवसाय पनि संचालन हुने हुँदा दुवैलाई राहत मिल्ने भएकोले यसो गरिएको हो ।’ रेवान पोखरामा १ सय वटा रेष्टुरेन्ट एण्ड बार आबद्ध छन् ।
होटलहरुको साझा संस्था पश्चिमाञ्चल होटल संघ अध्यक्ष विकल तुलाचनले पनि उल्लेख्यमात्रामा नभए पनि क्रमिक सुधार भइरहेको बताउँछन् । ‘सुषुप्तरुपमा राखेर भएन । बिस्तारै खोल्नुपर्छ भन्ने मान्यता सरकारको पनि छ । त्यसैले कार्यविधि पनि परिवर्तन हुँदै गएको हुनुपर्छ, ’ तुलाचन भन्छन्, ‘पोखरामा पछिल्लो दसैँतिहारपछि आन्तरिक पर्यटकहरुको आगमन दर बढेको हो । लकडाउन र निषेधाज्ञाको बेलामा बन्दै गरेर बस्नु परेको अवस्थामा थियो । अहिले छैन । पूर्ण रुपमा संचालन हुन नसके पनि आंशिक संचालनले सहज भएको छ ।’
पोखरामा केही महिनापछि पर्यटकको आगमन अझ बढ्नेमा उनी आशावादी छन् । भन्छन्, ‘भारतबाट नेपालमा हवाई उडान गर्ने कुरा छ । विगतमा पोखरासँगै मुक्तिनाथको भ्रमणमा आन्तरिक तथा भारतीय पर्यटकको ठूलो हिस्सा आउने गरेको हो । कोरोना संक्रमण दर घट्दै गयो र खोप नेपालसम्म आइपुग्यो भने पोखराको पर्यटनबाट संसारभर निकै सकारात्मक सन्देश जान्छ ।’
पोखरामा हाल २० देखि ४० वर्ष उमेर समूहका युवाहरु बढीमात्रामा घुम्न आउने गरेको पाइन्छ । घुम्ने क्रममा अप्रियखालका ठूलो घटना–परिघटना पनि हुन पाएको छैन । लामो समयको बन्दाबन्दीले गर्दा मानिस घरभित्रै खुम्चिनुपर्दा घुम्न लालायित छन् । ‘व्यवसायलाई दिगोपन दिन मानिसको चहलपहल हुनु आवश्यक छ । आर्थिक कारोबार हुनै पर्छ, ’ तुलाचन प्रष्ट पार्छन् ।
उनका अनुसार हाल पोखरामा ६० प्रतिशत जति होटलहरु खुलेको अवस्था छ । संघमा हाल करिब ५ सय होटल आबद्ध छन् । होटलमा यतिखेर १५ देखि २० प्रतिशत कर्मचारी फर्केका छन् । कुल कोठामध्ये ५० प्रतिशत कोठाहरु बिक्री हुने गरेको छ । अकुपेन्सी सोचेजस्तो नभए पनि निराश भैहाल्नुपर्ने अवस्था छैन । विगतमा यही सिजनमा गत वर्ष पोखरामा ६० प्रतिशतसम्म अकुपेन्सी हुन्थ्यो । पर्यटकीय सिजन भनेको विशेषगरी सेप्टेम्बर, अक्टोबर र नोभेम्बर महिनालाई मानिन्छ । त्यसबेला ८० प्रतिशतसम्म अकुपेन्सी हुने गरेको पाइन्थ्यो । डिसेम्बर लागेपछि बिस्तारै पर्यटकीय गतिविधि कम हुने र मार्चदेखि पुनः बढ्दै जाने गर्दछ ।
पोखरा पर्यटन परिषद्का नवनिर्वाचित अध्यक्ष गोपीबहादुर भट्टराईले पर्यटन व्यवसायी र मजदुर बचाउन यसअघि घोषित सहुलियत दरको पुनःर्कर्जालाई सरल ढंगले वितरण व्यवस्थाको माग गर्दछन् । उनले विषम परिस्थितिको आँकलन गर्दै सिङ्गो पर्यटन क्षेत्र चलायमान बनाइराख्न विभिन्न नीति अवलम्बन गर्दै जानुपर्ने बताउँछन् । उनले भने, ‘बाँच र बचाऔं’ भन्ने भाव सबैमा हुनुपर्छ ।
सरकारले असोज १ देखि पर्यटन क्षेत्रका गतिविधि संचालन अनुमति दिएसँगै पोखरा र यस आसपासमा पर्यटकीय गतिविधिहरु चलायमान हुन थालेका हुन् । साथै पर्यटक आकर्षित गर्न पर्यटनसम्बद्ध केही संस्थाले कोरोना बिर्साउँदै टूर प्याकेज नै घोषणा गरेका छन् ।
नेपाल एसोसिएसन अफ टुर्स एन्ड ट्राभल एजेन्ट्स (नाट्टा) गण्डकी प्रदेशले पोखरा र वरपरका गन्तव्य घुम्नको लागि कात्तिक १ देखि सस्तो प्याकेज ल्याएको थियो । नाट्टा गण्डकी प्रदेश अध्यक्ष सञ्जयकान्त सिग्देलले पोखरा र वरपरका गन्तव्य कोरोनाबाट सुरक्षित रहेको सन्देश दिन आफूहरुले सस्तो प्याकेज ल्याएको र पर्यटकीय गतिविधिमा सघाउ पुगेको बताए । कोभिड–१९ को बढ्दो संक्रमणबीच पनि पर्यटन क्षेत्र चलायमान बनाउन भ्रमण प्याकेज ल्याइएको उनको भनाइ छ ।
होटलहरुले पनि कोठामा करिब ५० प्रतिशत छुट, खानामा १५ प्रतिशत, स्पामा १० प्रतिशतसम्म छुट गरेका छन् भने प्याराग्लाइडिङमा ५० प्रतिशतसम्म छुटले प्याराग्लाइडिङ उड्नेहरुको संख्या ह्वात्तै बढेको हो । ट्रेकिङ व्यवसायीहरुको संस्था टान पोखराको टोली आन्तरिक भ्रमण प्रवद्र्धनको लागि गण्डकीका विभिन्न जिल्लाको भ्रमण गरी पोखरा फर्केको छ ।
पर्यटन क्षेत्रमा विशेषगरी होटल, रेष्टुरेन्ट, ट्राभल, ट्रेकिङ, साहसिक गतिविधि, पर्यटन सवारी लगायत पर्दछन् । पोखराको समग्र पर्यटन क्षेत्रमा हाल १ खर्ब २५ अर्ब रुपैयाँ लगानी छ ।
पोखरामा हाल डिस्कोथेक, डान्सबार, दोहोरी, गजल रेष्टुरेन्टहरु भने खुल्न बाँकी छ । यी व्यवसायीहरु पनि खुलेमा अझ पर्यटकीय गतिविधि बढ्नेमा आशावादी हुन सकिन्छ ।
Related News
सम्बन्धित समाचार
कतारका अमिरको भ्रमणसम्बन्धी खबर प्राथमिकतामा, विपिनको रिहाइ ‘मुख्य विषय’
रोजगार खोज्दै मेलामा
कतारी अमिरलाई ‘रुद्रकली’ र ‘खगेन्द्रप्रसाद’ !
फेवातालमा दुर्घटनामा परेका ५ जनाको उद्धार
लोकतन्त्रका १८ वर्ष : लोकतन्त्रले छोएन लोकलाई
hero news full width
मुख्य समाचार
कामचलाउ सरकारको आयु लम्बियो
गण्डकी सरकारविरुद्दको मुद्दा हेर्दाहेर्दैमा, आज टुंगो लागेन
वैशाख १०, २०८१कतारी राजा नेपाल आउने दिन भोलि सार्वजनिक बिदा
वैशाख १०, २०८१गण्डकी सरकार विरुद्धको रिट सपना र सारंगाको बेन्चमा
वैशाख १०, २०८१मुग्लिन–पोखरा सडक विस्तार : म्याद सकियो, काम अधुरै
वैशाख १०, २०८१कास्कीका सहकारी पीडित एउटै मोर्चामा : बन्यो संयुक्त संघर्ष समिति
वैशाख १०, २०८१