पोखरा । मध्यपहाडी लोकमार्ग निर्माण सुरु भएको १३ वर्षसम्म कास्कीमा रुट टुङ्गिएको छैन । अहिले याम्दीदेखि पर्वतसम्मको खण्ड स्तरोन्नतिको काम भइरहेको छ । लमजुङदेखि भैँसेसम्मको सडक पनि ट्रयाक खोलेर स्तरोन्नति भइरहेको छ । पहिले मादी करिडोरको नाममा ट्रयाक खोलिएको यो सडकबाट ‘मादी करिडोर’ नाम हटिसकेको छ । भैँसेदेखि याम्दीसम्मको रुट भने अहिलेसम्म छिनोफानो लागेको छैन । यो रुट धेरै पटक फेरिएको छ । दुई वर्षअघि प्रस्तावित रुट पुनः फेर्न लागिएको छ । दिनदिनै नेताहरु गाउँगाउँमा पुगेर लोकमार्ग छिराउने प्रतिबद्धता जनाउँदै फर्कन्छन् । लमजुङ र कास्कीको सीमाना रुदी दोभानबाट भैँसेसम्मको ट्रयाक कायम भैसकेको छ । भैँसेदेखि चितेपानी, सुनपँदाली, आर्वाको घारी, काहुँको फेदिबाट भलाम छुँदै बाटुलेचौरबाट याम्दी जोडिन्थ्यो । अहिले यसलाई संशोधन गरेर गाउँ केन्द्रित गर्न खोजिएको छ । ‘भ्यालीभित्र अर्को बाटो छँदै छ । लोकमार्गलाई गाउँतिर तान्न सकियो भने धेरैले सुविधा पाउँछन् ।
मान्छेको बसाइँसराइ रोकिन्छ कि भनेर परिवर्तनको प्रस्ताव गरेका हौं,’ जिल्ला समन्वय समिति कास्कीका प्रमुख वैनबहादुर अधिकारी क्षत्रीले भने, ‘पहिले सहमति बनाउनुपर्छ । माथि कुरा भएको छ । सकेसम्म रुट फेर्ने नै हो ।’
त्यसो त लमजुङको सुन्दरबजारदेखि नै ट्रयाकमा विवाद थियो । त्यो समाधान भएपछि कास्कीको रामकोट भएर वेगनास ताल निकाल्ने तयारी भयो । त्यसको विरोध भयो । त्यसपछि रामकोटबाट लिप्यानी, सौर्य भएर राखी मिजुरे, आर्वा निकाल्ने भनियो । त्यसमा पनि सहमति हुन सकेन । तेस्रो विकल्पमा भैँसे निकालेर सुनपदाँलीको रुट प्रस्ताव गरियो । यसमा सर्भे समेत गरेर ट्रयाक खोल्ने तयारी थियो । अहिले त्यस क्षेत्रका नेताहरुले टुङ्गिएको रुट हटाएर नयाँ प्रस्ताव अघि सारे । सम्भावित रुटको मुख्यमन्त्री पृथ्वीसुब्बा गुरुङ र इन्जिनियर समेतको टोलीले हेरेर फर्केको छ ।
यसअघि प्रस्तावित रुटमा धेरै संरचना भत्काउनुपर्ने भएकोले पनि नयाँ ट्रयाक खोज्न सके सहज हुने आयोजनाका पर्वत खण्ड प्रमुख मेघराज मरासिनीले बताए । ‘सर्भे गरेको समयभन्दा अहिले धेरै घरहरु बनिसके । धेरैले घडेरी बनाएका छन् । वर्षौं लगाएर कमाएको पैसाले दुईचार आना जोडेका छन्,’ उनले भने, ‘आयोजनाले जग्गाको पैसा दिँदैन । घरको पनि निकै कम मुआब्जा मिल्छ । त्यसैले यो बाटो ल्याउन सम्भावना कम छ ।’ उनका अनुसार भैँसेदेखि ज्याम्दु, मेलबोट, मौजा, अर्मलाकोट निकालेर भलाम हुँदै बाटुलेचौरदेखि याम्दी जोड्ने बाटो सबैभन्दा उपयुक्त देखिएको छ । ‘खासै लामो पर्दैन । बराबरी जस्तै देखिएको छ । घरहरु नपर्ने र लम्बाई उस्तै हुने हो भने र मध्येपहाडीको मर्म भावनालाई समेट्ने भएकोले यो बाटोमा चित्त बुझेको छ,’ मरासिनी भन्छन्, ‘मैले मात्रै भनेर हुँदैन । स्थानीयको चित्त बुझ्नुपर्छ । विभागले स्वीकृति दिनुपर्छ । हामीले हेरेको रुट जनताले चाहिँदैन भनिदिए समस्या पर्छ ।’ उनले सकेसम्म डीपीआर भएकै रुटबाट सडक ल्याउन पहल गर्ने बताए । डीपीआर अनुसार यो रुटको भैैँसेदेखि याम्दी खण्ड साढे २९ किलोमिटर पर्छ । रुदीबाट भैँसेसम्मको १६ किलोमिटर ट्रयाक खोलेर कालोपत्रेका लागि अहिले टेण्डर आह्वान गरिएको छ । यहाँ कालोपत्रेका लागि १ अर्बभन्दा बढी लागत अनुमान गरिएको छ ।
यता, कास्की काँग्रेसका सभापति कृष्ण केसीले पनि परिमार्जन गर्न लागिएको रुट उपयुक्त हुने बताए । ‘डीपीआर परिवर्तन गर्न सजिलो त छैन । यदि सम्भव भयो भने नयाँ ट्रयाक खोज्नु उपयुक्त देख्छु । पुरानो डीपीआरमा धेरै संरचना भत्काउनुपर्छ,’ उनले भने, ‘स्थानीयसँग कुरा गर्दा त्यही सुझाव दिएका छन् ।’ तराई छिचोलेर बनेको पूर्व–पश्चिम (महेन्द्र) राजमार्गको वैकल्पिकमार्गको रुपमा ठानिएको मध्यपहाडी लोकमार्गको काम देशभर फटाफट भैरहेको छ । प्रत्येक जिल्लामा छुट्टाछुट्टै क्लस्टर कायम गरेर काम गरिए पनि कास्कीमा भने रुट खोज्दैमा १३ वर्ष गुज्रिएको छ । २०७६ सालसम्म १ हजार ७ सय ६५ किलोमिटर लामो लोकमार्ग पूरा गर्ने लक्ष्य सरकारको छ ।
८० किलोमिटरभन्दा बढी सडक कास्की खण्डमा पर्छ । याम्दीबाट घट्टेखोलासम्मको सडक ४ लेनमा विस्तार भैरहेको छ भने थप २ लेन सर्भिस लेन हुनेछ । त्यसपछि नयाँपुलसम्म २ लेनको सडक निर्माणाधीन छ । पूर्वमा पाँचथरको चियो भञ्ज्याङबाट शुरु भएको मध्यपहाडी लोकमार्ग २४ वटा पहाडी जिल्ला छिचोल्दै सुदूरपश्चिमस्थित बैतडीको झुलाघाटमा पुगेर टुङ्गिन्छ । लोकमार्गमार्फत पहाडका २ सय २५ वटा बस्तीलाई सडक सञ्जालमा जोड्दा ७० लाखभन्दा बढी जनतालाई प्रत्यक्षरुपमा फाइदा पुग्ने अनुमान छ । तर ठाउँठाउँमा अहिले पनि लोकमार्गको ट्रयाक फेरबदल भैरहेका छन् । सडक निर्माण टुङ्गिने बेलासम्म यसको लम्बाई तलमाथि हुने देखिन्छ ।
Related News
सम्बन्धित समाचार
निसीखोला दुर्घटनाका घाइते भन्छन्- चालकको लापरबाहीले दुर्घटना भयो
सहकारी प्रकरणमा गृहमन्त्री लामिछाने दोषी प्रमाणित भए कारबाही गर्नेे प्रधानमन्त्रीको प्रतिबद्धता
पोखराका मेयर धनराज आचार्यलाई मातृशोक
जसुलाई रोटरी भोकेसनल एक्सिलेन्स अवार्ड
पोखराको काहुँडाँडामा भीषण आगलागी
hero news full width
मुख्य समाचार
बागलुङको निसीखोलामा बस दुर्घटना हुँदा ७ को मृत्यु, २० घाइते
मनाङेले लिए मन्त्रीको सपथ, टिक्ला पाण्डे सरकार ?
चैत्र ५, २०८०दीपक मनाङेलाई भाैतिक मन्त्रालय
चैत्र ५, २०८०चौथो पटक मन्त्री बन्दै दीपक मनाङे, आजै शपथ खुवाउने तयारी
चैत्र ५, २०८०सुन तस्करीमा संलग्न रहेको आरोपमा माओवादी उपाध्यक्ष कृष्णबहादुर महरा कपिलवस्तुबाट पक्राउ
चैत्र ५, २०८०गण्डकीका नयाँ प्रदेश प्रमुख भट्टले सम्हाले पदभार
चैत्र ४, २०८०