खैरेनीटार  । तनहुँ मिडिया नेटवर्क प्रालिद्वारा सञ्चालित शुक्लागण्डकी एफएमको चौथो साधारण सभा तथा तेस्रो अधिवेशनले पूर्णकुमार श्रेष्ठको अध्यक्षतामा नयाँ कार्य समिति चयन गरेको छ ।

समितिको वरिष्ठ उपाध्यक्षमा ज्योति श्रेष्ठ, उपाध्यक्षमा सरस्वती सिग्देल, सचिवमा ऋषेश्वर भुवार्इँ, सहसचिवमा सुरेन्द्र पौडेल, कोषाध्यक्षमा शिव पौडेल र सदस्यमा सुजित हिराचन, बुद्धिबहादुर थापा, टीकाराम श्रेष्ठ, सुवासचन्द्र गिरी, हरिलाल रिमाल, राजेन्द्र पौडेल र दिनेश घिमिरे सर्वसम्मत निर्वाचित भएका छन् ।

निर्वाचन कार्यक्रम संयोजकमा कमलमोहन घिमिरे तथा सदस्यमा तीर्थराज खनाल र राजन रिमाल रहेका थिए ।

त्यसअघि कार्यक्रम उद्घाटन गर्दै प्रमुख अतिथि गण्डकी प्रदेश सदस्य तथ पूर्व मन्त्री आशा कोइरालाले संचारको क्षेत्रमा राम्रो काम गरेकोमा एफएमको प्रशंसा गरिन् । उनले भुजिकोटलाई शुक्लागण्डकीको प्रमुख पर्यटकीय क्षेत्र बनाउनुपर्नेमा जोड दिइन् । साथै उनले सो ठाउँको विकास गर्न, जनताको कर्तव्य, जनप्रतिनिधको काम र कर्तब्य सचेत गराउने कार्यमा मिडियाको भूमिका सशक्त रहने बताइन् ।

कार्यक्रममा शुक्लागण्डकी वडा २ का वडा अध्यक्ष जगतबहादुर गुरुङ्ग, शुक्लागण्डकी एफएमका निवर्तमान अध्यक्ष नारायणकुमार श्रेष्ठ, वडा ६ का वडा सदस्य बुद्धिबहादुर थापाले बालकदेखि बृद्धसम्म सबैको मनमा बस्न सकेकोमा एफएमको प्रशंसा गरेका थिए ।

कम्पनीका सचिव ज्योति श्रेष्ठ र कोषाध्यक्ष शिव पौडेलले क्रमशः सचिव र कोषाध्यक्षको प्रतिवेदन प्रस्तुत गरेको कार्यक्रममा ढोरबाराही एफएमका स्टेशन म्यानेजर राजकुमार आले, पूर्ण आले लगायतले बोलेका थिए ।

यसै अवसरमा भुजिकोटलाई पर्यटकीय क्षेत्रको रुपमा चित्रण गरिएको एफएफका निवर्तमान अध्यक्ष नारायणकुमार श्रेष्ठको रचनाको गीत सार्वजनिक गरिएको थियो ।

कम्पनी अध्यक्ष नारायणकुमार श्रेष्ठको अध्यक्षता रहेको कार्यक्रममा स्वागत उपाध्यक्ष पूर्णकुमार श्रेष्ठ र सञ्चालन सचिव ज्योति श्रेष्ठले गरेका थिए ।