पोखरा, २७ कार्तिक । पोखरा महानगरपालिका वडा नं.५ द्वारा प्रकाशित वडा दर्पण अंक २ को लोकार्पण गरिएको छ । वडा बाल मञ्चका अध्यक्ष दीपिका भट्टराईले उक्त दर्पण लोकार्पण गरेकी हुन् ।

लोकार्पण कार्यक्रममा प्रमुख अतिथि भट्टराईले विकास निर्माणसँग सम्बन्धित लेखहरु, वडाका तथ्य तथ्यांकहरु सहितको यो पुस्तक वडाबासीले हेर्नैपर्ने पुस्तक भएको चर्चा गरिन् ।

वडा नं.५ का अध्यक्ष धनबहादुर नेपालीले प्रकाशनलाई निरन्तर गरिने, भए गरेका कामहरुको लिखित दस्तावेजको रुपमा वडा दर्पण पुस्तक रहेको चर्चा गरे ।

कार्यक्रममा समालोचक श्रीकान्त खतिवडाले प्रकाशनको काम सामान्य नभएको, नागरिकको सूचना पाउने अधिकारलाई प्रकाशनले समेटेको र आगामी दिनमा वडा दर्पण प्रकाशन निरन्तर रहने विश्वास व्यक्त गरे ।

विभिन्न २२ वटा लेखहरु, विवरणहरु रहेको पुस्तकमा आर्थिक वर्ष २०७४/०७५, २०७५/०७६, २०७६/०७७ मा सम्पन्न विकास योजनाहरुको विवरण समेत वडा दर्पणमा रहेको छ ।

वडा सदस्य उज्वल खत्रीको अध्यक्षतामा सम्पन्न सो कार्यक्रममा स्वागत पुष्पराज बराल र संचालन अञ्जु केसीले गरेकी थिईन् ।