पोखरा  । संघीय संसद्मा नेपाली काँग्रेसको कोटामा रिक्त सांसद पदमा मोहनप्रसाद पाण्डे आउने भएका छन् ।

समानुपातिकतर्फबाट सोमबार संघीय सांसद सूर्यबहादुर केसीको निधन भएसँगै सो पद रिक्त भएको छ । पाण्डे काँग्रेसका महासमिति सदस्य समेत हुन् ।

केसी खस आर्य कोटाबाट सांसद समानुपातिक सांसद बनेका थिए । निर्वाचन आयोगमा बुझाएको समानुपातिकको बन्द सूचीमा केसीपछि पाण्डेको नाम रहेको काँग्रेस केन्द्रीय कार्यालयका मुख्य सचिव कृष्णप्रसाद पौडेलले जानकारी दिए ।

२०७४ को प्रतिनिधिसभा सदस्य निर्वाचनमा काँग्रेसबाट खस आर्य पुरुषमध्ये पाँच जना सांसद बनेका थिए । त्यतिबेला पाण्डेको नाम छैटौं नम्बरमा थियो ।

स्याङ्जा निवासी पाण्डे २०६४ को संविधानसभा निर्वाचनमा स्याङ्जा–३ बाट निर्वाचित भएका थिए । २०३६ सालदेखि विद्यार्थी राजनीतिमा लागेका उनी २०४८ सालमा नेविसंघका केन्द्रीय सदस्य बनेका थिए ।