हेमजा । गण्डकी आयुर्वेद औषधालय पोखरामा औषधी अभाव भएको छ । औषधालयमा ग्यास्टिकको लागि प्रयोग हुने ‘अभिपतिकर चूर्ण’ तथा दिसा पातलो गराउन प्रयोग हुने ‘त्रिफला’ लगायत औषधी अभाव भएको हो । अभावका कारण कतिपय बिरामी औषधीबिनै घर फर्कनुपरेको छ ।

औषधालयका प्रमुख डा. कुमार कासुलाले यस वर्ष प्रथम चौमासिकमा खरिद गरिएका केही औषधी सकिएको जानकारी दिँदै अब चाँडै दोस्रो चरणमा औषधी खरिदको प्रक्रिया अगाडि बढाउने बताए । उनले बजेट निकासामा शीर्षक नमिलेका कारण पनि औषधी खरिदमा केही समस्या आएको दाबी गरे ।

विभिन्न कारणले बिरामी मर्काको पारेको स्वीकार गर्दै प्रमुख कासुलाले चाँडै नै शीर्षक मिलाएर खरिद प्रक्रिया अगाडि बढाउने र प्रदेश सरकारलाई पनि घच्घचाउने बताए ।

औषधालयबाट २९ प्रकारका औषधी निःशुल्क पाउनुपर्ने भएपनि कतिपय अवस्थामा बिरामीले पाउन सकेका छैनन् । औषधालयमा दैनिक २० देखि २२ जनासम्म बिरामी आउने गरेको बताइएको छ।