बुटवल  । लुम्बिनी प्रदेशसभामा प्रमुख विपक्षी दल नेपाली काँग्रेसको संसदीय दलको प्रमुख सचेतकमा फखरुद्दिन खान नियुक्त भएका छन् ।

काँग्रेस संसदीय दलका नेता वीरेन्द्रकुमार कनौडियाले काँग्रेस संसदीय दलको विधान २०७४ को दफा ११ (१) को अधिकार प्रयोग गर्दै बाँकेका सुरेन्द्र हमालको स्थानमा रुपन्देही ५ (२) बाट प्रत्यक्ष निर्वाचित खानलाई नियुक्त गरेका हुन् । खानलाई कात्तिक १७ गतेबाट लागू हुने गरी प्रमुख सचेतकमा नियुक्त गरिएको जानकारी प्रदेश सभाका सभामुख पूर्णबहादुर घर्तीलाई गराइसकेको नेता कनौडियाले जानकारी दिए । प्रमुख सचेतकमा नियुक्त ४० वर्षका खान प्रदेशसभाका काँग्रेस सांसदमध्ये अध्ययनशील र स्पष्ट वक्ताका रुपमा चिनिन्छन् ।

यसअघिका प्रमुख सचेतक हमालले सहमतीमै आफूले पद छाडेको प्रतिक्रिया दिएका छन् । आफ्नो कार्य व्यस्ततका कारण पद छाडेको उनको भनाइ छ । राजधानी बुटवलबाट दाङ सार्ने विषयमा दलका नेतासँग उनको दूरी बढेको चर्चा गरिएको थियो । तर कुनै विवादबिना पदबाट राजीनामा गरेको दलका नेता कनौडियाले बताएका छन् ।

प्रदेशको स्थायी राजधानी दाङ सार्ने सरकारको प्रस्तावको सम्बन्धमा काँग्रेस संसदीय दलले विपक्षमा मतदान गर्न आफ्ना सांसदहरुलाई ह्वीप जारी गरेको थियो । तर प्रमुख सचेतक हमाल सहितका केही सांसद उक्त निर्णयको विरुद्धमा थिए । तर मतदानका क्रममा हमाल आफन्त बिरामी भएका कारण अनुपस्थित थिए । तर अन्य ५ जना सांसदले पार्टीको ह्वीपविपरीत दाङको पक्षमा मतदान गरेका थिए ।