पोखरा । केही समयदेखि मधुमेहले थिचिरहेको थियो । दैनिक कामकाज रोकिएको थिएन । तर संसद् बैठकमा उपस्थित नभएको लामै समय भैसकेको थियो । सांसद तथा उद्योगपति सूर्यबहादुर केसी सोमबार सामान्य अवस्थामै सुते । राति एक्कासी सूगर घटेपछि केसीको सुतिरहेकै अवस्थामा निधन भयो । उनले देहत्याग गरेको अप्रिय खबर मंगलबार बिहानै एकाएक फैलियो । साथै अप्रत्यासित वर्षा समेत भयो । मानौ उनको शोकमा पोखरा रोइरहेको छ ।
स्व. केसीको मंगलबार नै पोखरा सेती नदी किनार रामघाटमा अन्त्यष्टि भयो । उनको पार्थीव शरीरमा नेपाली काँग्रेसका पूर्व महामन्त्री तथा सभामुख तारानाथ रानाभाट लगायत नेताहरुले अन्तिम श्रद्धाञ्जली व्यक्त गर्दै काँग्रेसको झन्डा ओढाए । प्रतिनिधिसभा सदस्य तथा काँग्रेसका केन्द्रीय आमन्त्रित सदस्य केसी पोखराका स्थापित उद्योगपति हुन् । उनी दुई पटकसम्म पोखरा नगरपञ्चायतको प्रधानपञ्च समेत बनेका थिए ।
पोखरालाई आधुनिक सहर बनाउन सूर्यबहादुर केसीको महत्वपूर्ण योगदान छ । अहिलेको सभागृह केसीकै कार्यकालमा पूरा भएको हो । पुरानो महेन्द्रपुलमा नयाँ पुल निर्माण उनले गरेका हुन् । केसी स्व. राजा वीरेन्द्रका विश्वासीला पात्र थिए । पोखरा भ्रमणमा आउँदा राजाले केसीलाई भेटेकै हुन्थे । भेटमा केसीले विकासेयोजना सुनाउँथे र राजाले हुकुम दिन्थे । केसीले गोरखा दक्षिणबाहु पदक पनि पाएका छन् । उनकै आग्रहमा राजा वीरेन्द्रले महेन्द्रपुल निर्माणका लागि सहयोग गरेका हुन् । यो पुलमा नेपालका अन्य नगरपञ्चायतले पनि सहयोग गरेका थिए । यही पुल बनाउन आँवुखैरेनीमा अञ्चलाधीशले कर उठाउन लगाएका थिए । राजाले उद्घाटन गर्ने भनिएको महेन्द्रपुल समेत राजाको सिफारिसमा उनले उद्घाटन गरेका थिए । कृषिमा आधुनिकता भित्र्याउनेदेखि जनसहभागितामा सडक स्तरोन्नतिको काम उनकै पालादेखि थालिएको हो ।
‘मान्छे ठूलो भएरमात्रै हुँदैन । असल हुनुपर्छ । केसीजी असल मान्छे हो,’ तत्कालीन नगर पञ्चायतका सदस्य विष्णुप्रसाद बास्तोलाले भने, ‘पोखराको विकासमा वहाँको योगदान कहिलै मेटिँदैन ।’ केसीले पोखरामा पहिलो पटक हरित सहर निर्माणको अभियान सुरु गरेका हुन् । पोखरा चक्रपथ परिकल्पना समेत उनकै पालामा नगरसभाबाट भएको थियो । पोखरा महानगरपालिका वडा १६ मा चिडियाखाना निर्माण गर्ने योजना पनि बनाएका थिए । यद्यपि दुवै योजना अहिलेसम्म कार्यान्वयनमा आउन सकेको छैन । उतिबेलै पोखरामा स्ट्रिट लाइट (सडक बत्ती) राख्ने निर्णय केसीले गरेका थिए । अन्तर्राष्ट्रिय विमानस्थल निर्माणमा उनको मुख्य जोड थियो । केसी पञ्चायत पक्षधर भएपनि सबै राजनीतिक पार्टीका प्रिय थिए ।
इगोले बनाएको प्रधानपञ्च
राजनीति चासोको विषय होइन । गण्डकी बोर्डिङ स्कुलबाट विद्यालय तहको पढाइ सके । पृथ्वीनारायण क्याम्पसमा उच्च शिक्षा लिए । बाबु कीर्तिबहादुर केसी पोखराका स्थापित निर्माण व्यवसायी थिए । सूर्यबहादुर केसी पनि बाबुको सिको गर्दै त्यतैतिर लागे । घर बनाउने समय आयो । नगरपालिकामा घरको नक्सापास गर्न पुगे । तर बाटोको मापदण्ड देखाएर तत्कालीन प्रधानपञ्च उत्तम पुनले आनाकानी गरेपछि केसीको मनमा प्रतिस्पर्धी भावना जन्मियो । त्यही बेला उनले पुनलाई भनेका थिए, ‘कुनैदिन म तिम्रो कुर्चीमा हुनेछु । त्यो समयको प्रतीक्षा गर्नू ।’ २०३९ सालमा त्यति बोलेका केसीले वचन पूरा गरिछाडे ।
पुनलाई भ्रष्टाचारको आरोप लागेपछि तत्कालीन नगर पञ्चायत नै खारेज भयो । र, २०४१ सालको उपनिर्वाचनमा केसी उनै पुनका प्रतिस्पर्धी बने । निर्वाचनमा केसीले जित्दा पुन पराजित भए । केसी २०४३ सालमा दोस्रो पटक प्रधानपञ्चमा निर्वाचित भएका थिए तर २०४६ सालमा बहुदल आएकोले पूरै कार्यकाल काम गर्न पाएनन् । ‘सायद राजनीतिमा वहाँ लाग्नुहुन्नथ्यो होला । एउटा घरको नक्सापास सजिलोसँग नपाएपछि वहाँले आफूलाई पूरै परिवर्तन गर्नुभयो,’ उनका कानूनी सल्लाहकार दुर्गाप्रसाद कोइरालाले भने । उनी नेपालमै सबैभन्दा कान्छा उमेरका प्रधानपञ्च हुन् । २७ वर्षकै उमेरमा पोखरा नगरको प्रधानपञ्च बनेका थिए, केसी ।
स्थानीय निकायको निर्वाचनपछि उनी २०५६ सालमा नगरपरिषद्को अध्यक्ष भएर काम गरे । केसी २०५१ सालको संसदीय निर्वाचनमा कास्की क्षेत्र २ बाट उम्मेदवार थिए । ११ हजार मत ल्याएका उनी तेस्रो बने । राष्ट्रिय प्रजातन्त्र पार्टीको कास्की अध्यक्ष हुँदै पोखरामा सम्पन्न महाधिवेशनबाट केन्द्रीय कोषाध्यक्षमा निर्वाचित भए । त्यसपछिको कार्यकाल पनि उनी कोषाध्यक्ष भए । राप्रपाबाटै २०६४ को पहिलो संविधानसभा चुनावमा सदस्य बनेका केसी २०७४ मा नेपाली काँग्रेसबाट प्रतिनिधिसभा सदस्यमा मनोनीत भएका थिए । त्यसबेला राप्रपा परित्याग गरी काँग्रेस प्रवेश गरेर आमन्त्रित केन्द्रीय सदस्य भएका हुन् । पोखरामा पहिलो पटक वडा कार्यालय बनाउने र मुखिया राख्ने काम उनैले सुरु गरेका हुन् ।
पञ्चायतकै कुर्चीबाट बहुदलको विगुल
बहुदल स्थापनाका लागि चौतर्फी आन्दोलन चलिरहेको थियो । तत्कालीन राप्रपा एकातिर थियो भने अरु पार्टी फरक मोर्चामा थिए । देशभरका अधिकांश स्थानीय निकायमा पञ्चहरु निर्वाचित भएका थिए । केसी पनि राप्रपाको संस्थापन पक्षबाट निर्वाचित भएका हुन् । यस्तो बेला पञ्चायतविरुद्ध बोल्नु निकै चुनौतिपूर्ण थियो । तर उनले कहिलै आफूलाई पञ्चको गुलाम बनाएनन् । सदा परिवर्तनको पक्षमा उभिए ।
‘पञ्चायतको निकायमा बसेर बहुदल अंगीकारको प्रस्ताव पठाउने पोखरा एकमात्र नगरपालिका हो । तत्कालीन राजनीतिक संकटबाट मुक्ति दिन वहाँ बहुदलकै पक्षमा हुनुहुन्थ्यो,’ तत्कालीन काँग्रेसबाट उपप्रधानपञ्च बनेका तीर्थ श्रेष्ठले भने, ‘बहुदलीय शासन दिए शीरोधार्य गर्न तयार रहेको भनेर नगर पञ्चायतबाट निर्णय ग¥यौं । नगरपालिकाबाट यस्तो निर्णय गर्दा समस्या हुने भएपछि केसीजीको निवासमा बसेर निर्णय गरेका थियौं ।’ श्रेष्ठकै प्रस्तावमा २०४६ चैतमा त्यो निर्णय भएको थियो । श्रेष्ठ त्यसलाई ऐतिहासिक र अभूतपूर्व निर्णय रुपमा लिन्छन् । उनको नजरमा केसी विकासप्रेमी र विनोदप्रिय व्यक्ति हुन् ।
खाद्यान्न अभाव टार्न किसानलाई सहुलियत दिएर फाँटमा खेती गर्ने अभियान चलाए । कुडहर फाँट, बिरुवा र ठूलीबेंसी फाँटमा दुई बाली खेती गर्न किसानलाई अह्राएर राम्रो उत्पादन गर्ने किसानलाई पुरस्कार दिने प्रणालीको थालनी गरे । सेती नहरलाई शाखा बनाएर तरकारी खेतीको विकास गरे । पोखरालाई तरकारीमा आत्मनिर्भर बनाउने अभियान उनकै पालामा सुरु भएको थियो । उत्पादनले ३० प्रतिशतमात्रै माग धान्ने पोखरामा यो अभियानपछि ६० प्रतिशत उत्पादन बढ्यो । जनसहभागितामा सडक कालोपत्रे गर्ने कामको थालनी केसीले गराएका थिए । तत्कालीन समयमा बनेका योजना र निर्णयहरु कार्यान्वयन नहुँदा अहिले पोखरा अव्यवस्थित बन्दै गएको श्रेष्ठले सुनाए । ‘उहाँको आमछवि विकास चाहने व्यक्ति हो । सबैका लोकप्रिय हुनुहुन्थ्यो,’ श्रेष्ठले सम्झे, ‘वहाँसँग सहयोग माग्न गएको कोही पनि रित्तो हात फर्किएको छैन ।’
अनि केसी काँग्रेस भए……
२०५६ सालमा निर्वाचनको रौनक थियो । सबै राजनीतिक पार्टीले केसीलाई आफूतिर तान्ने भरमग्दुर प्रयास गरे । उनी डेग चलेनन् । त्यसो त केसी एमालेबाट चुनाव लड्ने होहल्ला व्यापक भैसकेको थियो । जानकारहरुका अनुसार उनी एमाले छिर्ने लगभग पक्का भैसकेको थियो । उनलाई पार्टी प्रवेश गराउन तत्कालीन महासचिव माधवकुमार नेपाल पोखरा आउने कार्यक्रम थियो । तर उनी कामविशेषले आउन भ्याएनन् ।
‘नेपालजी आउनुभएको भए केसी सर पहिले नै एमाले हुने मान्छे हो । सबै कुरा लगभग फाइनल भएको थियो,’ कोइरालाले भने, ‘कुरा कसरी बिग्रियो थाहा छैन । नेपालजी आउनुभएन । पार्टी प्रवेश कार्यक्रम स्थगित भयो ।’ केसी माओवादीसँग भने सधैँ दूरी राख्थे । परिवार स्रोतका अनुसार उनलाई तत्कालीन माओवादीले साह्रै नै दुःख दिएको थियो । यतिसम्म कि आफ्नै जेठा छोराको विहेको पार्टी हुँदा रामबजारमा उनी गएनन् ।
क्षेत्रबहादुर केसी, हर्कबहादुर गुरुङ लगायतलाई गोली हानिएको थियो । केसीलाई पनि पटक–पटक थ्रेट आइरहन्थ्यो । त्यसैले उनी माओवादीलाई खासै रुचाउँदैनथे । पछिल्लो पटक माओवादी र एमालेको एकीकरण नभएको भए उनी एमाले प्रवेश गर्ने तयारीमा थिए । दुई पार्टीको एकीकरणले उनलाई काँग्रेस बनायो ।
काठमाडौंलाई चुनौती
उद्योगजति काठमाडौंमा । बैंक उतै । मान्छेहरु सामान्य जागिर खान पनि उतै जानुपथ्र्यो । जसका कारण गाउँहरु खाली हुँदै थिए । पोखराजस्ता सहर पनि सहरजस्तो हुन सकेको थिएन । केसीले उद्योगमार्फत काठमाडौंलाई चुनौती दिए । राजनीतिभन्दा केसी व्यावसायिक व्यक्ति हुन्, उनी । उद्योग खोलेर रोजगारी सिर्जना गर्नुपर्छ भन्ने उनको धारणा थियो । उनले चाउचाउ उद्योग खोल्दा दक्षिण एशियामा कतै पनि चाउचाउको उद्योग थिएन ।
विदेशबाट आउनेहरुले ल्याएको चाउचाउको स्वादमा मोहित भएका केसी आफैले चाउचाउ उद्योग खोल्ने योजना बनाए । यसको दुई वटा पाटा थिए–एउटा उद्योगमार्फत रोजगारी दिने र अर्को पोखरामै चाउचाउ उत्पादन गरेर भोकाहरुको भोक मेट्ने । २०२३ सालमा उनले गण्डकी नूडल्स कम्पनीमार्फत रारा चाउचाउ उत्पादन गर्न थाले । पचास लाखबाट सुरु उद्योग अहिले हिमश्री फूड्सको नाउँमा संचालित छ । हाल यहाँ अर्बभन्दा बढी लगानी छ । पोखरामै उनले राष्ट्रियस्तरको माछापुच्छ्रे बैंक खोले । उज्यालो नेपाल अभियानअन्तर्गत उनले दर्जनभन्दा बढी हाइड्रोपावर संचालनमा ल्याए । सन् २००५ मा ४.८ मेगावाटको गण्डकी हाइड्रोपावर बनाएर खोलामा खेल्न थालेका उनको दर्जन आयोजनामा लगानी छ । एक मेगावाटको टास्क हाइड्रो, १३ मेगावाटको सिक्लेस हाइड्रो, साढे ४ मेगावाटको भगवती हाइड्रो, २५ मेगावाटको अपर मादी, अपर सेती, विजयपुर–२, इदी मर्दी, करुवा, सुप्रिम, सिभिल लगायत आयोजनामा उनको लगानी छ ।
नेपाल इन्जिनियरिङ कलेज, नेपाल मेडिकल कलेज, पोखरा टूरिजम एण्ड होटल म्यानेज्मेन्ट कलेज लगायत कलेजहरु उनैले स्थापना गरे । कालिका बहुमुखी क्याम्पस र पोखरा बहुमुखी क्याम्पस केसी नगरपञ्चायतमा हुँदै स्थापना गरिएको हो । कालिकाका संस्थापक अध्यक्ष उनी पछिल्लो समयसम्मै अध्यक्ष थिए । पृथ्वीनारायण क्याम्पसले मात्रै विद्यार्थीको माग पूरा गर्न नसक्ने भन्दै उनले निजी क्षेत्रबाट शिक्षा क्षेत्रमा कदम राखेका थिए । उनको हाउजिङमा पनि अर्बौ रुपैयाँ लगानी रहेको बताइन्छ । यहाँको पर्यटन र होटलमा समेत केसीको लगानी छ ।
‘कोक–फेन्टाले सूगर’
केसी प्रधानपञ्च हुँदा पोखरामा भर्खरभर्खर कोक–फेन्टा आउन थालेको थियो । त्यतिबेला कोक–फेन्टा खाने मान्छे प्रतिष्ठित कहलिन्थ्यो । केसीका हरेक बैठकहरुमा कोक–फेन्टा हुन्थे । धेरै पिएपछि २०५० ताका उनलाई मधुमेह देखियो । ‘मेरो परिवारमा कसैलाई सूगर छैन । वहाँको परिवारमा पनि छैन,’ कानूनी सल्लाहकार कोइरालाले भने, ‘मलाई लाग्नुभन्दा २ वर्षअघि वहाँले सूगरको औषधी खान थाल्नुभयो । कोक धेरै खाएरै हामीलाई सूगर लागेको हो ।’ उनी धार्मिक र सामाजिक क्षेत्रमा समेत उत्तिकै सक्रिय व्यक्ति हुन् । जुन शान्तिघाटमा केसीको शव बिसर्जन भयो, उनी त्यहाँको संरक्षक समेत हुन् ।
Related News
सम्बन्धित समाचार
पुरानो पोखरा जोगाउन पहल: मेयर आचार्य
सुदुरपश्चिममा सोडारी मुख्यमन्त्री नियुक्त
प्रेमील गजलकारको भावपूर्ण बिदाइ
अधिवेशन आह्वानप्रति कांग्रेसको आपत्ति, द्वन्द्व निम्तिन सक्ने चेतावनी
गण्डकी प्रदेश सभाको अधिवेशन आह्वान
hero news full width
मुख्य समाचार
गण्डकीमा अधिवेशन डाक्न सिफारिस, मुख्यमन्त्रीले विश्वासको मत लिँदै
दृष्टिविहीनलाई बाटो देखाउँदै गुगल
वैशाख ४, २०८१प्रकट पगेनी ‘शिव’ को निधन
वैशाख ४, २०८१कामचलाउ मुख्यमन्त्री अधिकारी विश्वासको मत लिने तयारीमा
वैशाख ४, २०८१फेरि बढ्यो पेट्रोल, डिजेल र मट्टितेलको भाउ
वैशाख ३, २०८१अन्नपूर्ण क्षेत्रमा भित्रिए ९ महिनामा १ लाख ४४ हजार पर्यटक
वैशाख ३, २०८१