पोखरा । नेपालको पूर्वी जिल्ला सिन्धुलीको सलपाका सुन्दर विश्वकर्माले फेवातालमा डुंगा चलाउन थालेको ३२ वर्ष पुग्यो । तर अहिलेजस्तो बेचैन अवस्था कहिल्यै भोग्नुपरेन । कोरोना भाइरस संक्रमण जोखिमका कारण लकडाउन र निषेधाज्ञाले पूरै ६ महिना उनको डुंगा चल्न पाएन । पेसा व्यवसाय ठप्प बन्यो । सरकारले असोज १ देखि डुंगा चलाउन छुट त दियो, तर यतिका डेढ महिना बितिसक्दा पनि सोचेजस्तो काम पाएका छैनन् । दिनभर पालो कुर्दै दिन जान्छ । जेनतेन दुई तीन सय गोजीमा पर्दछ ।
सुन्दर विश्वकर्मा उमेरले ५१ वर्षका भए । २०४५ सालतिर कामको खोजीमा उनी यहाँ आएका हुन् । सलपाबाट आएका उनी फेवामा डुंगा चलाउने त्यस भेगका सबैभन्दा पुराना चालक हुन् । उनी यहाँ आएपछि धेरै मानिसहरु सलपाबाट फेवामा डुंगा चलाउन आए । सुन्दर भन्छन्, ‘म आएको ३२ वर्ष भो । यहाँ आउँदा सिन्धुलीको सलपाबाट कोही आएका थिएनन् । म पहिलो हो । पछि धेरै जना आए । तर यतिका समय बितिसक्दा अहिलेजस्तो अवस्था कहिल्यै भएन ।’
कात्तिक मध्यको एक बिहानी । ग्राहकको पर्खामा बसेका उनी आफ्नो डुंगा नम्बर ५८ भित्र भरिएको पानी फाल्दै थिए । आफ्नो परिवार नै डुंगामा आश्रित छ । उनका यहाँ कुल ५ वटा डुंगा चल्छन् । तर एउटै डुंगाको पालो कुरिरहनुपर्छ । फेवामा डुंगा चलाउन फेवा डुंगा व्यवसायी समितिले क्यू सिष्टम (आलोपालो प्रणाली) लागू गरेको छ । गत वर्षको चैत ११ देखि नै फेवातालमा डुंगा चल्न रोकिएका हुन् । सरकारले असोज १ देखि चलाउन पाउने स्वीकृति दिए पनि त्यसको भोलिपल्ट असोज २ देखिमात्र डुंगा चालकले सिक्रीले बाँधिएका डुंगा खोल्न थालेका हुन् । तर अपेक्षाकृत ग्राहक पाउन सकेका छैनन् । विदेशी त छँदै छैनन् । आन्तरिक पर्यटकहरु फाट्टफुट्ट आउँछन् । मन्दिर प्रवेशमा रोक लगाइएपछि ताल सयरका लागि मात्र केहीले भाडामा डुंगा लिने गरेका छन् । सुन्दरका अनुसार हाल दैनिक ४०/५० वटामात्र डुंगा बाराही घाटबाट छुट्छन् । आलोपालो प्रणालीअनुसार दिनहुँ पालो पाउन मुस्किल छ । अन्य घाट तुलनामा सबैभन्दा व्यस्त हुने बाराहीघाटबाट मात्रै कुल ३ सय ५६ डुंगा चल्छन् ।
चिजमान गुरुङ कास्कीको घान्द्रुकका हुन् । उनी फेवामा डुंगा चलाउने अर्का पाका चालक हुन् । यहाँ डुंगा चलाउन थालेको १७/१८ वर्ष पूरा भो । चिजमान पनि सुन्दरझैं पालो पर्खेर बसेका छन् । लामो समय लकडाउन र निषेधाज्ञाले उनको डुंगा चलाउने पेसा रोकिएको थियो । रोजीरोटीको लागि ६१ वर्षको उमेरमा पनि डुंगा चलाउन नछोडेका चिजमानले भने, ‘दिनहुँ आयो, पालो आउँदैन । एक सातामात्र बल्ल पालो आउँछ । गुजारा टार्नै धौधौ छ ।’ परिवारमा श्रीमती र २ छोरीहरु छन् । सबै जना चिजमानको डुंगामा आश्रित थिए । तर कोरोना भाइरस प्रभाव कारण उनीहरु सबैको रोटीरोटी गुम्यो । तैपनि डुंगा चलाउन पाइन्छ कि भनी कुर्दै बसे । असोज लागेपछि डुंगा चलाउन पाइने भएपछि केही खुसीको संचार त ल्यायो तर मानिस नै नआएपछि यसरी साता दिनसम्म पालो कुर्नुको विकल्प छैन । गएको ६ महिनासम्म डुंगा चलाउन नपाएपछि उनीहरु बेसहारा बने । वडा कार्यालय र डुंगा व्यवसायी संघले केही राहतमा चित्त बुझाए । चिजमानले त्यसबेला जीवन धान्न बेलाबखत कुल्ली काम गरेको सुनाए ।
एउटा डुंगा तालको बीचमा रहेको बाराही मन्दिर वरिपरि घुमाएर ल्याउँदा ४ सय रुपैयाँसम्म कमाइ हुन्छ । बाराही मन्दिर दर्शनका लागि भने अझै रोक लागेकोले त्यसको वरिपरिमात्र सामाजिक दूरी कायम गरी चलाउन पाइएको हो । नभए डुंगा भाडामा लिएर जाने पनि बेलाबखत आउँछन् । एक घण्टाको ६ सय रुपैयाँसम्म दररेट तोकिएको छ । समय बढी लिन चाहे, त्यसअनुरुप पैसा बढ्दै जान्छ ।
डुंगा व्यवसायी समितिका अनुसार बाराही घाटबाट हाल दैनिक औसत ४०/५० वटा डुंगाले मात्र पालो पाउने गरेका छन् । निषेधाज्ञा हटेसँगै सुरुका दिनमा १०/१२ वटामात्र डुंगा चल्ने गरेका थिए । अचेल केही बढे पनि सबैले काम पाएका छैनन् ।
फेवा डुंगा व्यवसायी समितिका कर्मचारी जीवन बिकेका अनुसार गाडी तथा जहाज चल्न थाले पनि कोरोना डरले पहिलेजस्तो मानिस आएका छैनन् । वर्षदिनमा सबैभन्दा व्यस्त हुने कोजाग्रत पूर्णिमाको दिन यसपालि फेवाताल डुंगा कम चले । सरकारले मन्दिर खोल्न रोकेपछि मानिस आउने कुरै भएन । एउटा डुंगामा बढीमा १० जनासम्म अट्ने भए पनि सामाजिक दूरी कायम गर्नुपर्ने भएकोले ४ जनाभन्दा बढी चढाइएको छैन । मानिसहरुको अलि बढी आवातजावत हुँदै गए छिटो–छिटो पालो आउने उनको भनाइ छ ।
सिजनको बेलामा फेवामा डुंगा सयरहरुले पालो कुरेरै बस्नु पथ्र्यो । तालभरि डुंगाको ताँती लाथ्यो । दिनैपिच्छे पनि हरेक डुंगाले पालो पाउने गरेका थिए । अहिले सिजन भएर पनि कोरोना प्रभावले समग्र पर्यटन व्यवसायसहित पेसा जर्जर भएको हो । फेवातालमा डुंगा चलाएरै ५ सय जना डुंगा चालकको रोजीरोटी चल्ने गरेकोमा कोरोनाकै कारण उनीहरुको गाँस गुम्दै जाने डर छ ।
फेवा डुंगा व्यवसायी समिति अध्यक्ष बुद्धिबहादुर नेपाली भन्छन्, ‘निम्न आएका मानिसहरुले छाक टार्ने माध्यम डुंगा पेसा थियो । अहिले बेला नै यस्तो पर्यो। कोरोना कहिले हट्छ र सजिलो होला ।’ फेवातालमा डुंगा व्यवसाय व्यवस्थापनका लागि २०५१ सालमा नेपालीको अध्यक्षतामा फेवा डुंगा व्यवसायी समिति गठन भएको हो । फेवामा विभिन्न ८ वटा घाटमा हाल ८ सय वटा डुंगा चल्छन् । फेवातालमा बाराहीघाट सहित गौरीघाट, अम्बोट, फिस्टेल, पहारी, फेवा, स्वीमिङ पुल र बंगलादी गरी ८ घाटबाटै डुंगा चल्छन् ।
कोरोना महामारी न्यूनीकरण हुनुको साटो दसैँपछि त झन्झन् बढ्दो छ । गण्डकीमा मात्र सोमबार १ सय २३ जना संक्रमित थपिएका छन् । आइतबारमात्रै २४ घण्टा अवधिमा अहिलेसम्मकै धेरै ४ सय २४ जना संक्रमित भेटिएका थिए । देशभर सोमबार २ हजार ९ सय ३३ संक्रमित थपिँदा २४ जनाको मृत्यु भएको स्वास्थ्य तथा जनसंख्या मन्त्रालयले जनाएको छ ।
Related News
सम्बन्धित समाचार
लोकतन्त्रका १८ वर्ष : लोकतन्त्रले छोएन लोकलाई
कामचलाउ सरकारको आयु लम्बियो
पाेखरा नयाँबजारको महायज्ञ समापन
सहकारी पीडित आन्दोलित
गण्डकी सरकारविरुद्दको मुद्दा हेर्दाहेर्दैमा, आज टुंगो लागेन
hero news full width
मुख्य समाचार
कतारी राजा नेपाल आउने दिन भोलि सार्वजनिक बिदा
गण्डकी सरकार विरुद्धको रिट सपना र सारंगाको बेन्चमा
वैशाख १०, २०८१मुग्लिन–पोखरा सडक विस्तार : म्याद सकियो, काम अधुरै
वैशाख १०, २०८१कास्कीका सहकारी पीडित एउटै मोर्चामा : बन्यो संयुक्त संघर्ष समिति
वैशाख १०, २०८१अधिकारी सरकारको भविष्य के होला ? सर्वाेच्चमा सुनुवाइ आज
वैशाख १०, २०८१कास्कीका सहकारी पीडित एउटै मोर्चामा, बन्यो संयुक्त संघर्ष समिति
वैशाख ९, २०८१