पोखरा । नेपालको तीनदिने भ्रमणमा आउन लागेका भारतीय सेनाध्यक्ष मनोज मुकुन्द नरवणेको भ्रमण रोक्न माग गर्दै पोखरामा विरोध प्रदर्शन गरिएको छ ।

नेपाल र नेपाली जनताको अपमान गरेको भन्दै भारतीय सेनाध्यक्षको भ्रमण रोक्न माग गर्दै संयुक्त देशभक्त मोर्चाको पहलमा सोमबार जिल्ला प्रशासन कार्यालय अघि १ घण्टा धर्ना दिइएको हो ।

कालापानी, लिम्पीयाधुरा र लिपुलेकबारे नेपाल कसैको इशारामा चलिरहेको भारतीय सेनाध्यक्ष नरवणेको अभिव्यक्ति निन्दनीय लज्जास्पद भएको भन्दै विरोध प्रदर्शन गरिएको मोर्चाका प्रवक्ता रामबहादुर पौडेलले बताए । साथै मोर्चाले नरवणेलाई नेपाली सेनाको मानार्थ महारथीको दर्जासमेत नदिन माग गरेको छ ।

धर्नाका सहभागीले भारतीय सेनाध्यक्षको भ्रमण रद्ध गर, भारतीय सेनाध्यक्षलाई सम्मान गर्ने परम्परा खारेज गर, नेपाल र नेपालीको अपमान गर्ने भारतीय सेनाध्यक्षलाई शीतल निवासमा स्वागत किन ?, भारतीय सेना कालापानी तुरुन्तै छोडलगायत नाराअंकित प्लेकार्ड बोकेका थिए ।

मोर्चा संयोजका वरिष्ठ अधिवक्ता तिलक पराजुलीले भारतीय हस्तक्षेपका कारण देश अप्ठ्यारोमा परेका बेला राज्यलाई दवाब दिन सहभागी सम्पूर्णमा आभार व्यक्त गर्दै भारतीय सेनाध्यक्षको भ्रमण रद्द हुनुपर्नेमा जोड दिए । नरवणेले कात्तिक १९ देखि २१ सम्म नेपाल भ्रमण गर्दैछन् ।