सन्तोष समिक्षाको एउटै मुटु गीत सार्वजनिक

आदर्श समाज सम्वाददाता
कार्तिक ८, २०७७

पोखरा । गायक सन्तोष बस्याल र गायिका समिक्षा अधिकारीको नयाँ गीत सार्वजनिक भएको छ । एउटै मुटु बोलको गीत सार्वजनिक भएको हो। इश्वर खड्का ‘विशाल’ले लेखेको गीतलाई संगीतकार बाबुल गिरीले संगीत गरेका हुन् । प्रथम क्षेत्रीको निर्देशनमा तयार भएको म्युजिक भिडियोमा क्षेत्री सहित एन्जिला बानियाँको अभिनय रहेको छ ।

गीत सार्वजनिक भएपछि गायक बस्याल आशावादी देखिन्छन् । पोखरामा रहेर संगीत सँगै पत्रकारिता क्षेत्रलाई अगाडि बढाइरहेका बस्यालको यो पहिलो लोक गीत हो । यसअघि बस्यालले जीवन सुनारको शब्दसंगीतमा मैले तिमीलाई माया गर्दा, योगेश काजीको शब्दसंगीतमा ओम गुरुङसँगै युगल गीत रेशम फिरिरि, दिपक शर्माको शब्दसंगीतमा ढाट्यो मायाले लगायतका गीत सार्वजनिक गरिसकेका छन् ।

लोक गीत संगीतबाटै आफ्नो सांगीतिक यात्रा शुरुवात गरेका बस्याल आफ्नी आमाको प्रेरणाबाट गीतसंगीत क्षेत्रमा छिरेका हुन् । उनकी आमाले गाउँमा अझै पनि गाउने गर्छिन् । आमासँगै रोधीमा सहभागी बन्दै गर्दा आफूले गीत गाउन सिकेको बस्याल बताउँछन् ।

बस्याल भन्छन्,‘सार्वजनिक भएको उक्त गीत मेरो पहिलो लोकगीत हो । यसअघि मैले आधुनिक र पप गीत सार्वजनिक गरेपनि यसपाली लोक गीत सार्वजनिक गरेको हुँ ।’ उसो त बस्याललाई गायक भएपछि सबै खालको गीत गाउन सक्ने हुनुपर्छ जस्तो लाग्छ । नेपाली संगीतको धरातल नै मौलिक लोकगीत भएकाले यसको संरक्षणमा सबैको ध्यान पुग्नुपर्ने तर्क बस्याल राख्छन् । बस्याल विगत १० वर्षदेखि संगीतमा आबद्ध छन् । शास्त्रिय संगीत सिक्दै गरेका बस्याल पर्वतका हुन् । उनी प्रवीणता परिक्षा उतिर्ण गरेपश्चात पोखरा आएका थिए । स्कुल पढ्दा देखिनै रेडियो सुन्न असाध्यै मन पराउने बस्याललाई रेडियोले नै गायक बनायो भन्दा फरक नपर्ला । पोखराको रेडियो अन्नपूर्णबाट संचारकर्म शुरुवात गरेका बस्याल पछिल्लो समय परिचय नेटवर्कमा समेत आबद्ध छन् ।

संगीत सँगसँगै पत्रकारितामा रहरले आएका थिए बस्याल । त्यहि रहर नै आज उनका लागि गरिखाने बाटो बनेको छ । सांगीतिक प्रस्तुतिका लागि बस्याल नेपालका विभिन्न ठाउँमा पुगेका छन् । दर्शकलाई झुमाउन सक्ने क्षमता भएका बस्यालको माछापुच्छ«े हिमचुलीको छायाँ खस्यो फेवातालैमा, विर नेपाली, बस है प्यारी लगायतका गीत आउने क्रममा छन् ।

लकडाउनले उनलाई पाठ सिकाएको छ । भन्छन्,‘कोरोना महामारीले मलाई पाठ सिकाएको छ । कलाकार अब गीत संगीतमा मात्रै लागेर नहुने रहेछ । केही न केही उद्यमशिलतामा आबद्ध हुनुपर्ने सोच पलाएको छ । निकट भविष्यमा सानै भएपनि व्यवसायमा हात हाल्ने योजनामा छु ।’

बस्याललाई पछिल्लो समयकी चर्चित गायिका समिक्षा अधिकारीले साथ दिएकी हुन् । उनी पोखरा लाहाचोककी हुन् । सुरिलो आवाजकी धनि अधिकारीका थुप्रै गीतले चर्चा कमाएका छन् । अधिकारी समेत उक्त गीतबाट आशावादी देखिन्छन् । सन्तोष सँग युगल गीत गाउन पाउँदा उनी खुशी छिन् । भन्छिन्,‘ सन्तोष दाई सँग मेरो पहिला भेट भएको थिएन । यही गीतले समय जुरायो । उहाँको आवाज खारिएको पाए । मनको समेत उहाँ सफा हुनुहुँदो रहेछ । सहयोगी भावनाको पाए । यस्ता व्यक्तिसँग युगल गीत गाउन पाउँदा खुशी छु ।’

प्रथम क्षेत्री एक मिहिनेती कलाकार हुन् । संगीतमै संघर्षशिल क्षेत्री अभिनय मार्फत म्युजिक भिडियोमा आएका हुन् । भारतमा केही समय अभिनय अध्ययन गरेका क्षेत्रीले पछिल्लो समय आफैले निर्देशन समेत गर्न थालेका छन् । सार्वजनिक ‘एउटै मुटु’ दुई प्रेमीको कथामा आधारित रहेको उनले बताए । पछिल्लो समय एसिड आक्रमणमा परी धेरै युवतीहरु भविश्यबाट अन्यौल भएको अवस्थामा समस्यामा परेका त्यस्ता व्यक्तिहरुको साथमा पनि कोहि हुन्छ भन्ने सन्देश म्युजिक भिडियो मार्फत प्रवाह गरिएको छ ।

गीतकार इश्वर खड्का ‘विशाल’ बागलुङका हुन् । पोखरामा एक रेष्टुरेण्ट संचालन गर्दै आएका उनी केही समय दोहोरी साँझमा समेत आबद्ध थिए । गीत लेख्न उनले सानैदेखि थालेका हुन् । विद्यालयको कार्यक्रममा गीत लेख्दै आफै प्रस्तुत गर्ने गर्थे । आर्थिक समस्याका कारण खड्काले उक्त गीत सार्वजनिक गर्न पाएका थिएनन् । आज आएर आफुले लेखेको गीत सार्वजनिक हुँदा उनी खुशी देखिन्छन् ।

सोलो मोसन पिच्चरको प्रस्तुतिमा सार्वजनिक भएको गीतको म्युजिक भिडियोको निर्माता इश्वर थापा, हरि क्षेत्री र देविस तण्डन क्षेत्री हुन् । गीतलाई प्रथम क्षेत्रीको अफिसियल युट्युब मार्फत सार्वजनिक गरिएको हो । अन्नत घिमिरेको सम्पादन र कलरिङ रहेको म्युजिक भिडियोको डिओपी सुमन कार्कीले गरेका हुन् । बाबुल गिरीको संगीत संयोजन रहेको गीतलाई श्यामस्वेत रसाइलीले मिक्सिङ एवं मास्टरिङ गरेका हुन् । म्युजिक भिडियोको छायाँकन काठमाडौंमा गरिएको हो ।