कांग्रेसबाट निर्वाचित जनप्रतिनिधिको भत्ता कोरोना उपचारमा

Avatar आदर्श समाज सम्वाददाता
कार्तिक ६, २०७७

तनहुँ । तनहुँमा नेपाली कांग्रेसबाट निर्वाचित सबै जनप्रतिनिधिको दशैं भत्ता कोरोना उपचारमा खर्च गरिने भएको छ । जिल्ला समन्वय समितिका प्रमुख शान्तिरमण वाग्ले र ब्यास नगर प्रमुख बैकुण्ठ न्यौपानेको नेतृत्वमा बसेको बैठकले कोरोना कोषमा रकम दिने निर्णय गरिएको हो ।

तनहुँ बाट निर्वाचित स्थानीय तहका प्रमुख तथा उपप्रमुख र अध्यक्ष तथा उपाध्यक्षले सहमति जनाएका छन् । जिल्ला समन्वय प्रमुख वाग्ले र उप प्रमुख पवित्रा पौडेल, व्यास प्रमुख न्यौपाने र उप प्रमुख जोशी, भानु प्रमुख उदयराज गौली र उप प्रमुख आशा थापा, शुक्लागण्डकी प्रमुख किसान गुरुङ, म्याग्दे अध्यक्ष माया राना र उपाध्यक्ष बालकृष्ण घिमिरे, ऋषिङ अध्यक्ष राजेन्द्रकृष्ण श्रेष्ठ र उपाध्यक्ष गिनुमाया थापा, आँबुखैरेनी गाउँपालिकाका अध्यक्ष गिरबहादुर थापा र उपाध्यक्ष पुष्पा श्रेष्ठ तथा देवघाट गाउँपालिकाकी उपाध्यक्ष विमला थापाले निर्णयमा सहमति जनाएका छन् ।

समन्वय प्रमुख वाग्लेले ३२ हजार र उपप्रमुख पौडेलले ३० हजार कोषमा जम्मा हुने गरि व्यास नगरपालिकाका प्रमुख प्रशासकीय अधिकृत डिल्लीराम सिग्देललाई हस्तान्तरण गरे । त्यस्तै नगरप्रमुख न्यौपाने र उपप्रमुख जोशीले ३०÷३० हजार कोभिड कोषमा जम्मा गरेका छन् । अन्य पालिकाका प्रमुख, उपप्रमुख, अध्यक्ष र उपाध्यक्षले दशैं खर्चको रकम आ–आफनै पालिकाको कोरोना कोषमा जम्मा गरेका छन् ।

नगरप्रमुख र उपप्रमुखले ३०/३० हजार साथै अध्यक्ष र उपाध्यक्षले २५/२५ रकम आ–आफनो पालिकाको कोरोना कोषमा जम्मा गर्ने निर्णय भएको हो । उनीहरुले आफनो पालिकावासी सँग पीसीआर शुल्क नलिने घोषणा गरेका छन् । सरकारले पिसिआर परीक्षण गर्दा शुल्क लिने बताएपनि उनीहरुले निशुल्क परीक्षण गर्ने तनहँु कांग्रेसका सभापति तथा व्यास नगर प्रमुख न्यौपानेले बताए ।